નવી દિલ્‍હી તા.૯: ભારતીય જનતા પાર્ટી (ભાજપ) ના કેન્‍દ્રીય પાર્ટી મુખ્‍યાલયને પશ્ચિમબંગાળ, આસામ, કેરળ, તમિલનાડુ અને પુડુચેરીમાં વિધાનસભા ચૂંટણી દરમિયાન કુલ રૂા. ૧,૪૭૨.૮ કરોડ મળ્‍યા. આ માહિતી પક્ષ દ્વારા ચૂંટણી પંચને સુપરત કરાયેલ ચૂંટણી ખર્ચની વિગતોમાંથી મળે છે. ચૂંટણી પંચે હવે આસામ, તમિલનાડુ અને પુડુચેરી માટે ખર્ચનો ડેટા જાહેર કર્યો છે. ચૂંટણી પૂર્ણ થયા પછી, ૬ મે, ૨૦૨૬ ના રોજ ભાજપનું ક્‍લોઝિગ બેલેન્‍સ રૂા. ૭,૬૨૭.૨ કરોડ હતું. ૧૫ માર્ચ, ૨૦૨૬ ના રોજ આ રકમ રૂા. ૬,૭૨૨.૬ કરોડ હતી.

ભાજપે, કેન્‍દ્રીય મુખ્‍યાલય અને સંબંધિત રાજ્‍ય અને જિલ્‍લા એકમો સહિત, આસામ, તમિલનાડુ અને પુડુચેરી વિધાનસભા ચૂંટણીઓ પર કુલ રૂા. ૧૬૦ કરોડ ખર્ચ્‍યા. આસામમાં સૌથી વધુ ખર્ચ થયો. માહિતી અનુસારઃ

આસામઃ રૂા. ૯૬.૩ કરોડ

તમિલનાડુઃ રૂા.૫૧.૬ કરોડ

પુડુચેરીઃ રૂા. ૧૧.૯ કરોડ

ટાઈમ્‍સ ઓફ ઈન્‍ડિયાના અહેવાલ મુજબ, પાર્ટીએ સામાન્‍ય ચૂંટણી પ્રચાર પર આશરે રૂા. ૧૩૦.૪ કરોડ ખર્ચ્‍યા. ઉમેદવારોને એકમ રકમ ચૂકવવા અને તેમના ફોજદારી કેસ સંબંધિત માહિતીના પ્રસાર પર રૂા.૨૯.૬ કરોડ ખર્ચ્‍યા.

ભાજપે આસામમાં સામાન્‍ય પક્ષ પ્રચાર પર કુલ રૂા. ૭૬.૭ કરોડ ખર્ચ્‍યા. આમાં કેન્‍દ્રીય એકમ દ્વારા ખર્ચવામાં આવેલા રૂા. ૨૩.૧ કરોડનો સમાવેશ થાય છે. પાર્ટીએ ઉમેદવારો પર રૂા. ૧૯.૫ કરોડ ખર્ચ્‍યા.

સ્‍ટાર પ્રચારકોના પ્રવાસ ખર્ચ પાછળ રૂા. ૨૭.૩ કરોડ ખર્ચવામાં આવ્‍યા હતા, જ્‍યારે જાહેરાતો પાછળ રૂા. ૩૭ કરોડ ખર્ચવામાં આવ્‍યા હતા. પ્રચાર સામગ્રી પાછળ રૂા. ૮.૯ કરોડ અને અન્‍ય વસ્‍તુઓ પાછળ રૂા. ૨.૩ કરોડ ખર્ચવામાં આવ્‍યા હતા.

ઉમેદવારોને કુલ રૂા. ૧૯.૪ કરોડ એક સાથે આપવામાં આવ્‍યા હતા. ઉમેદવારોના ફોજદારી કેસ સંબંધિત માહિતી પ્રકાશિત કરવા પાછળ રૂા. ૧૬.૭ લાખ ખર્ચવામાં આવ્‍યા હતા.

તમિલનાડુમાં, ભાજપે સામાન્‍ય પક્ષના પ્રચાર માટે રૂા. ૪૪.૫ કરોડ મંજૂર કર્યા હતા. ઉમેદવારો પર પણ રૂા. ૭ કરોડ ખર્ચવામાં આવ્‍યા હતા.

આ ચૂંટણી માટે અગાઉ જાહેર કરાયેલી કોંગ્રેસની ચૂંટણી ખર્ચની વિગતોમાં કુલ રૂા. ૨૪૮.૬ કરોડ ખર્ચ દર્શાવવામાં આવ્‍યા હતા. પશ્ચિમબંગાળ અને કેરળમાં ચૂંટણી ખર્ચ અંગેના ભાજપના નિવેદનો હજુ સુધી ચૂંટણી પંચ દ્વારા જાહેર કરવામાં આવ્‍યા નથી.