પેરિસ : ફ્રાન્સમાંથી સોશિયલ મીડિયા પર વાયરલ થયેલા એક અનોખા કિસ્સાએ આખી દુનિયાનું ધ્યાન ખેંચ્યું છે. ફ્રાન્સમાં હાઇસ્કૂલના વિદ્યાર્થીઓ દ્વારા કરવામાં આવી રહેલા વિરોધ પ્રદર્શનો વચ્ચે એક રહસ્યમય અને વિચિત્ર નારો 'બિસ્મિલ્લાહ, સે લે તેનેબ્ર' (Bismillah, c'est les ténèbres) અત્યારે ચર્ચાનું કેન્દ્ર બન્યો છે. પર્યાવરણ કાર્યકર્તા ગ્રેટા થનબર્ગ દ્વારા આ શબ્દસમૂહને પુનરાવર્તિત કર્યા બાદ આ મામલો વૈશ્વિક સ્તરે વાયરલ થઈ ગયો છે અને હવે આ નારો ફ્રાન્સની શાળાઓથી લઈને બેલ્જિયમ અને ઈટાલીના યુવા આંદોલનો સુધી પહોંચી ગયો છે.

આ સમગ્ર વાયરલ કહાનીની શરૂઆત ઓક્ટોબરની શરૂઆતમાં થઈ હતી, જ્યારે ફ્રાન્સના વિદ્યાર્થીઓ શૈક્ષણિક સંસ્થાઓને બ્લોક કરવા માટે સ્નેપચેટ (Snapchat) જેવા પ્લેટફોર્મ પર પ્રાઇવેટ ગ્રુપ ચેટ દ્વારા આયોજન કરી રહ્યા હતા. આ દરમિયાન ગ્રુપમાં 'મમાદૌ' નામના એક યુઝરે એન્ટ્રી લઈને અસહજ ભાષામાં મેસેજ કર્યો કે, "હાય, બિસ્મિલ્લાહ, સે લે તેનેબ્ર, ભાઈ, આ બ્લોકેડ ક્યારે છે?" વિદ્યાર્થીઓને તરત જ શંકા ગઈ કે કિશોરોની આજના સમયની સ્લેંગ ભાષા સાથે મેળ ન ખાતો આ મેસેજ કોઈ અંડરકવર પોલીસ અધિકારી અથવા વયસ્ક વ્યક્તિ દ્વારા ગુપ્ત માહિતી મેળવવા માટે મોકલવામાં આવ્યો છે.

આ અજીબોગરીબ ભાષાકીય પ્રયોગમાં અરેબિક શબ્દ 'બિસ્મિલ્લાહ' (જેનો અર્થ ઈશ્વરના નામે અથવા ચલો શરૂ કરીએ થાય છે) અને ફ્રેન્ચ શબ્દસમૂહ 'સે લે તેનેબ્ર' (જેનો અર્થ 'આ અંધકાર છે' થાય છે) નું અદ્ભુત મિશ્રણ હતું. યુવાનોએ આ વાક્યનો અર્થ કાઢ્યો કે "ઈશ્વરના નામે, આ તો ભારે અંધકાર છે!" અને પોલીસની આ નાકામ ચાલને એક ફની મીમ અને કટાક્ષમાં ફેરવી દીધી. 'ધ ન્યૂ યોર્ક ટાઇમ્સ' અને 'યુરો ન્યૂઝ' જેવા પ્રતિષ્ઠિત અખબારોના અહેવાલો મુજબ, આ નારો અધિકારીઓ અને યુવા પેઢી વચ્ચેના મોટા જનરેશન ગેપનું પ્રતીક બની ગયો છે, જ્યાં વયસ્કો કિશોરો જેવા 'કૂલ' દેખાવાના ચક્કરમાં જાહેરમાં હાસ્યાસ્પદ સાબિત થયા છે. ફ્રાન્સના પ્રશાસન કે ગૃહ મંત્રાલયે આ અંગે કોઈ સત્તાવાર નિવેદન આપ્યું નથી, પરંતુ ઇન્ટરનેટ યુગમાં આ કિસ્સો યુવાનોની એકતા અને મનોરંજનનું મોટું હથિયાર બની ગયો છે.