ઉદયપુર: તા.૦૮ ભારતના ઇતિહાસમાં જેમના નામ માત્રથી દેશભક્તિ અને શૌર્યનો સંચાર થાય છે, તેવા મેવાડના સપૂત મહારાણા પ્રતાપની આવતીકાલે એટલે કે 9 મે ના રોજ જન્મજયંતિ છે. 1540 માં જન્મેલા આ અજોડ યોદ્ધાના જન્મોત્સવની પૂર્વસંધ્યાએ જ દેશભરમાં ઉત્સાહનો માહોલ જોવા મળી રહ્યો છે. માતૃભૂમિની રક્ષા માટે મુઘલ સલ્તનત સામે એકલા હાથે ટક્કર લેનાર અને ઘાસની રોટલી ખાઈને પણ ક્યારેય ગુલામી ન સ્વીકારનાર મહારાણા પ્રતાપ આજે પણ કરોડો ભારતીયો માટે પ્રેરણાના સ્ત્રોત છે.
મહારાણા પ્રતાપ માત્ર એક શાસક જ નહીં, પરંતુ અટલ સ્વાભિમાનનું જીવતું જાગતું ઉદાહરણ હતા. હલ્દીઘાટીના મેદાનમાં તેમણે બતાવેલું પરાક્રમ અને પોતાના પ્રિય અશ્વ 'ચેતક' સાથેની તેમની અતૂટ જોડીના કિસ્સાઓ આજે પણ લોકમુખે ગવાય છે. ઇતિહાસકારો નોંધે છે કે અકબરની વિશાળ સેના સામે લડવા છતાં મહારાણાએ ક્યારેય હાર નહોતી માની અને જંગલોમાં ભટકીને પણ મેવાડના ગૌરવને અકબંધ રાખ્યું હતું. તેમની આ અણનમ હિંમતને કારણે જ તેમના દુશ્મનો પણ તેમની બહાદુરીના વખાણ કરતા થાકતા નહોતા.
આ ખાસ અવસરે લોકો વ્હોટ્સએપ, ફેસબુક અને ઇન્સ્ટાગ્રામ જેવા માધ્યમો દ્વારા શાયરી અને સંદેશાઓ મોકલીને શૌર્યની વધામણી આપી રહ્યા છે. "જેનું નામ સાંભળીને મુઘલો પણ થથરી જતા" અને "જેમણે માતૃભૂમિ માટે સર્વસ્વ ન્યોછાવર કર્યું" તેવા પ્રેરણાત્મક સૂત્રો સાથે યુવા પેઢીમાં પણ દેશપ્રેમનો જુવાળ જોવા મળી રહ્યો છે. મેવાડની ધરતી પર વિવિધ સાંસ્કૃતિક કાર્યક્રમો અને શોભાયાત્રાઓનું આયોજન કરવામાં આવ્યું છે, જેમાં હજારો લોકો જોડાઈને આ વીર યોદ્ધાને શ્રદ્ધાંજલિ અર્પણ કરશે.
શાળા-કોલેજોમાં પણ મહારાણા પ્રતાપના જીવન પર આધારિત વ્યાખ્યાનો અને સ્પર્ધાઓ યોજાઈ રહી છે, જેથી નવી પેઢી ભારતીય સંસ્કૃતિ અને ઈતિહાસના સાચા રક્ષકોના બલિદાનને સમજી શકે. મહારાણા પ્રતાપ જયંતિ એ માત્ર એક તહેવાર નથી, પરંતુ દેશ માટે કંઈક કરી છૂટવાના સંકલ્પનો દિવસ છે.