ન્યુયોર્ક : ક્રિપ્ટો જગતમાં અત્યાર સુધીનો સૌથી મોટો અને ખતરનાક વિસ્ફોટ થયો છે! વિશ્વના નંબર વન અને સૌથી મોટા ક્રિપ્ટો એક્સચેન્જ 'બાયનન્સ' (Binance) પર રાક્ષસી હેકિંગ હુમલો થતાં આખી ક્રિપ્ટો દુનિયામાં સનસનાટી મચી ગઈ છે. એક જ ઝાટકે ૨.૮ અબજ ડૉલર (અબજો રૂપિયા) ની કિંમતનું ફંડ ડ્રેઈન થઈ જતાં માર્કેટમાં ભૂકંપ જેવી સ્થિતિ સર્જાઈ છે. માત્ર એક જ કલાકની અંદર અંદાજે ૬૨૮ મિલિયન ડૉલરના લિવરેજ્ડ પોઝિશન્સ ફોર્સ-ક્લોઝ થતાં રોકાણકારોના શ્વાસ અધ્ધર થઈ ગયા છે. આ અતિ-સનસનીખેજ ઘટના બાદ બિટકોઈન સડસડાટ નીચો પટકાઈને ૭૯,૦૦૦ ડૉલરની નીચે સરકી ગયો છે, જ્યારે એક્સચેન્જનો પોતાનો ટોકન બીએનબી (BNB) પણ ૬.૩ ટકા જેટલો તૂટી પડ્યો છે.

ઘટનાની વિગતો મુજબ, રાત્રે ૨૦:૨૪ યુટીસી (UTC) સમયની આસપાસ બાયનન્સના હોટ વૉલેટ પર અચાનક ત્રાટકેલા હેકર્સે એક જ ઘામાં અબજો રૂપિયાની અસ્કયામતો પર હાથ સાફ કરી લીધો હતો. આ ચોંકાવનારી ઘટનાથી ગભરાયેલા રોકાણકારોએ પડાપડી કરી મૂકતા બજારમાં રીતસરની સુનામી આવી ગઈ હતી. માર્કેટની આ ભયાનક હાલત જોઈને બાયનન્સના સહ-સ્થાપક ચાંગપેંગ ઝાઓ (CZ) એ પણ સ્વીકારવું પડ્યું કે આ ખરેખર એક મોટો હેક જ છે.

અબજોના ફ્રીઝિંગ અને બ્લોકચેન પર અફરાતફરી: આ મહા-કૌભાંડ બહાર આવતાની સાથે જ સ્ટેબલકોઈન દિગ્ગજો હરકતમાં આવી ગયા હતા. ટેથર (Tether) અને સર્કલ (Circle) દ્વારા તાત્કાલિક ધોરણે કડક કાર્યવાહી કરીને હેકરના એડ્રેસ પર રહેલા આશરે ૨.૪ અબજ ડૉલરના સ્ટેબલકોઈન્સ (જેમાં ૧.૧૮ અબજ યુએસડીટી અને ૮૨૩ મિલિયન યુએસડીસી સામેલ છે) ને બ્લોક એટલે કે ફ્રીઝ કરી દેવામાં આવ્યા છે. જોકે, હેકરોએ આ ફ્રીઝિંગ થાય તે પહેલા જ કરોડો રૂપિયાના અન્ય ટોકન્સ અન્યત્ર ખસેડી દીધા હોવાની આશંકા છે. આ જોખમને ધ્યાનમાં રાખીને એક્સચેન્જ દ્વારા સોલાના અને એક્સઆરપી સહિતના અનેક નેટવર્ક પરના ઉપાડ (Withdrawals) તાત્કાલિક અસરથી અસ્થાયી રૂપે રોકી દેવામાં આવ્યા છે.

એશિયન બજારોમાં ધાક-ધ્રૂજ અને ભવિષ્યની ચિંતા: આ ભયાનક હેક હુમલા બાદ ટોક્યો, સિઓલ અને હોંગકોંગ જેવા મુખ્ય એશિયન બજારોમાં પણ ભારે ફફડાટ ફેલાઈ ગયો છે. રોકાણકારોમાં ડરનો માહોલ છે કે જો એક્સચેન્જ પોતાના કટોકટી ભંડોળ (SAFU) અથવા અંગત ફંડમાંથી આ નુકસાનની ભરપાઈ નહીં કરે, તો ક્રિપ્ટો માર્કેટમાં હજુ પણ મોટો કડાકો બોલી શકે છે. હાલ તો એજન્સીઓ અને સુરક્ષા ટીમો હેકરો દ્વારા છોડવામાં આવેલા ડિજિટલ પુરાવાઓને આધારે સઘન તપાસ ચલાવી રહી છે, પરંતુ આ ઘટનાએ ક્રિપ્ટો સિક્યોરિટીની પોલ ખોલી નાખી છે.