પટના: બિહારની રાજનીતિ અત્યારે એક એવા વળાંક પર ઉભી છે જ્યાં દરેક ક્ષણે સમીકરણો બદલાઈ રહ્યા છે. મુખ્યમંત્રી નીતિશ કુમારના રાજ્યસભામાં ગયા બાદ ખાલી પડેલી મુખ્યમંત્રીની ખુરશી પર કોણ બેસશે, તેને લઈને અટકળોનું બજાર ગરમ હતું. યુવાઓમાં અત્યંત લોકપ્રિય અને લોક જનશક્તિ પાર્ટી (રામવિલાસ)ના વડા ચિરાગ પાસવાનનું નામ આ રેસમાં સૌથી આગળ હતું, પરંતુ હવે ખુદ ચિરાગે જ આ મામલે સ્પષ્ટતા કરીને ચાહકોને આશ્ચર્યમાં મૂકી દીધા છે.
ચિરાગે રેસમાંથી પોતાને કર્યા બહાર
કેન્દ્રીય મંત્રી ચિરાગ પાસવાને શનિવારે એક મહત્વપૂર્ણ નિવેદન આપતા જણાવ્યું હતું કે તેઓ મુખ્યમંત્રી પદની રેસમાં નથી. તેમણે નવી સરકારના માળખા અંગે ખુલાસો કરતા કહ્યું કે, બિહારમાં માત્ર નેતૃત્વ (મુખ્યમંત્રી) બદલાશે, સરકાર કે મંત્રીમંડળના માળખામાં કોઈ મોટો ફેરફાર કરવામાં આવશે નહીં. જોકે, તેમણે સંકેત આપ્યો હતો કે નવા મંત્રીમંડળમાં કેટલાક જૂના ચહેરાઓને બદલે નવા અને યુવા ચહેરાઓને સ્થાન મળી શકે છે.
પાર્ટીમાં ચિરાગ માટે પ્રબળ માંગ
ભલે ચિરાગ પાસવાન પોતે રેસમાંથી બહાર હોવાનું કહી રહ્યા હોય, પરંતુ તેમની પાર્ટી LJP (આર) ના ધારાસભ્યો અને મંત્રીઓ સુર પુરાવી રહ્યા છે કે બિહારના ભવિષ્ય માટે ચિરાગ પાસવાન જ શ્રેષ્ઠ ચહેરો છે. પાર્ટીના એક મજબૂત જૂથનું માનવું છે કે બિહારના યુવાનો ચિરાગને મુખ્યમંત્રી તરીકે જોવા માંગે છે. જોકે, અંતિમ નિર્ણય એનડીએ (NDA) ના ટોચના નેતૃત્વ અને ભાજપની રણનીતિ પર છોડવામાં આવ્યો છે.
મુખ્યમંત્રી નિવાસસ્થાને બેઠકોનો દોર
શનિવારે સવારે પટનામાં રાજકીય હલચલ તેજ બની હતી. જેડીયુના કાર્યકારી પ્રમુખ સંજય ઝા અને મંત્રી વિજય કુમાર ચૌધરીએ મુખ્યમંત્રી નિવાસસ્થાને લગભગ બે કલાક સુધી બેઠક કરી હતી. સૂત્રોના જણાવ્યા અનુસાર, આ બેઠકમાં નવા મંત્રીમંડળમાં યુવા ચહેરાઓને પ્રાધાન્ય આપવા અંગે ગંભીર ચર્ચા થઈ હતી.
ભાજપ પણ એક્શન મોડમાં
બીજી તરફ, ભારતીય જનતા પાર્ટી પણ સક્રિય થઈ ગઈ છે. બિહાર ભાજપના પ્રભારી વિનોદ તાવડે પટનામાં એક મહત્વપૂર્ણ બેઠક યોજવા જઈ રહ્યા છે. આ બેઠકમાં નવા મુખ્યમંત્રીના ચહેરા અને આગામી ચૂંટણીઓની રણનીતિ પર મહોર વાગી શકે છે.
બિહારના રાજકારણમાં હવે સવાલ એ છે કે જો ચિરાગ પાસવાન નહીં, તો મુખ્યમંત્રીની કમાન કોના હાથમાં જશે? શું ભાજપ કોઈ નવો પ્રયોગ કરશે કે પછી જેડીયુના કોઈ વરિષ્ઠ નેતા પર પસંદગી ઉતારવામાં આવશે, તે જોવું રસપ્રદ રહેશે.