​અયોધ્યા : દેશ અને દુનિયાના લાખો રામભક્તોની આસ્થાનું પ્રતીક એવા અયોધ્યાના ભવ્ય રામ મંદિરમાં આપવામાં આવતા દાનને લઈને એક ચોંકાવનારો ખુલાસો થયો છે. એક પ્રતિષ્ઠિત ન્યૂઝ ચેનલ ‘ટાઈમ્સ નાઉ’ દ્વારા કરવામાં આવેલા એક સનસનાટીભર્યા સ્ટિંગ ઓપરેશનમાં શ્રી રામ જન્મભૂમિ તીર્થ ક્ષેત્ર ટ્રસ્ટના મહાસચિવ ચંપત રાયના ગેસ્ટ હાઉસમાં દાનના વ્યવહારમાં ગંભીર ગેરરીતિઓ આચરવામાં આવતી હોવાનો દાવો કરવામાં આવ્યો છે. આ ખુલાસા બાદ ભક્તોની આસ્થા સામે સવાલો ઉભા થયા છે.

​સ્ટિંગ ઓપરેશનના અહેવાલ મુજબ, આ ગેસ્ટ હાઉસમાં ભક્તો દ્વારા આપવામાં આવતું સોનું અને ચાંદી કોઈપણ પ્રકારના અધિકૃત બિલ, રસીદ કે હિસાબ વગર સ્વીકારવામાં આવે છે. કેમેરામાં સ્પષ્ટપણે જોઈ શકાય છે કે ટ્રસ્ટના મહાસચિવના આ સ્થળે વ્યવસ્થિત દાન પેટી કે રસીદ બુકના બદલે શંકાસ્પદ રીતે ધાતુઓનો સંગ્રહ થઈ રહ્યો છે. રિપોર્ટમાં દાવો કરવામાં આવ્યો છે કે ત્યાં હાજર વ્યક્તિઓ દ્વારા દાન લેતી વખતે કોઈ પણ સત્તાવાર નોંધ કરવામાં આવતી નથી, જે સીધી રીતે ગેરકાયદેસર નાણાકીય વ્યવહાર અને દાનની હેરાફેરી તરફ ઈશારો કરે છે.

​આ સ્ટિંગના વીડિયોમાં સંવાદો દરમિયાન એવી ચોંકાવનારી બાબતો પણ બહાર આવી છે કે આ રીતે લેવામાં આવતું દાન ટ્રસ્ટના મુખ્ય ખાતામાં જમા કરવાને બદલે અન્યત્ર વાળવામાં આવે છે. લાખો શ્રદ્ધાળુઓ પોતાની કમાણીમાંથી રામ મંદિર માટે સોનું અને ચાંદી દાન કરે છે, ત્યારે ટ્રસ્ટ સાથે જોડાયેલા પદાધિકારીઓના ગેસ્ટ હાઉસમાં આ પ્રકારની ‘ગેરકાયદેસર વસૂલાત’ અને પારદર્શિતાના અભાવે આખા મામલાને શંકાના દાયરામાં લાવી દીધો છે.

​ભગવાન રામના મંદિરના નિર્માણ અને વ્યવસ્થાપન માટે બનેલા ટ્રસ્ટની આંતરિક કામગીરીમાં આટલી મોટી ગેરરીતિ સામે આવતા સમગ્ર અયોધ્યામાં અને દેશભરના રામભક્તોમાં આક્રોશ ફેલાયો છે. અત્યાર સુધી આ મામલે ટ્રસ્ટ તરફથી કોઈ પણ સત્તાવાર નિવેદન કે સ્પષ્ટતા કરવામાં આવી નથી. હવે આ સ્ટિંગ ઓપરેશન બાદ મંદિરના દાનના હિસાબ અને તેમાં સંડોવાયેલા લોકો સામે કાયદાકીય તપાસની માંગ પ્રબળ બની છે.