નવી દિલ્હી : કોંગ્રેસનાં પૂર્વ અધ્યક્ષ સોનિયા ગાંધીએ પોતાના નવા સંસ્મરણ પુસ્તક ‘બિલોંગિંગ: અ જર્ની ઓફ લવ’ દ્વારા જીવનના અનેક અંગત અને વણસ્પર્શ્યા પ્રસંગોનો ખુલાસો કર્યો છે. આ પુસ્તકમાં નેહરુ-ગાંધી પરિવારની આંતરિક વાતો, કટોકટી, મેનકા ગાંધી સાથેના સંબંધો અને પોતાની બીમારી ઉપરાંત એક અત્યંત દુઃખદ ઘટનાનો પણ ઉલ્લેખ કરવામાં આવ્યો છે, જેમાં સોનિયા ગાંધીએ પહેલીવાર જાહેરમાં જણાવ્યું છે કે તેમણે પોતાના પહેલા બાળકને જન્મના બીજા જ દિવસે ગુમાવ્યું હતું.

સોનિયા ગાંધીના સંસ્મરણો અનુસાર, જાન્યુઆરી ૧૯૬૯માં તેમનો પુત્ર નિર્ધારિત સમય કરતાં લગભગ ૨ મહિના વહેલો જન્મ્યો હતો. ૧૮ જાન્યુઆરીએ સામાન્ય પ્રસૂતિ દ્વારા બાળકનો જન્મ થયા બાદ તેને તરત જ ઇન્ક્યુબેટરમાં રાખવામાં આવ્યો હતો. સોનિયાએ પુસ્તકમાં લખ્યું છે કે તેમણે બાળકનો પહેલો અવાજ સાંભળ્યો હતો અને ત્યારબાદ રાજીવ ગાંધી તેમને બાળકને બતાવવા લઈ ગયા હતા, જ્યાં બાળકના ઘેરા કાળા વાળ અને લાંબી, પાતળી આંગળીઓ જોઈને બંનેને પહેલી નજરમાં જ અપાર પ્રેમ થઈ ગયો હતો.

જોકે, ડોક્ટરોએ બાળકના બચવાની શક્યતા અંગે પહેલેથી જ આશંકા વ્યક્ત કરી હતી, જે આઘાતજનક રીતે સાચી પડી. બીજા દિવસે સવારે લગભગ ૬:૩૦ વાગ્યે રાજીવે સોનિયાને બાળકના નિધનના સમાચાર આપ્યા હતા, જેનાથી આ યુગલ સંપૂર્ણપણે તૂટી પડ્યું હતું અને બંને એકબીજાને ભેટીને રડી પડ્યાં હતાં. આ અતિ સંવેદનશીલ ઘટસ્ફોટે રાજકીય પરિવારની ચારેય બાજુ ચર્ચા જગાવી છે.

આ પુસ્તક પ્રકાશિત થવાથી સોનિયા ગાંધીના અંગત જીવનના સંઘર્ષો અને રાજીવ ગાંધી સાથેના તેમના ગાઢ ભાવનાત્મક સંબંધોના નવા પાસાઓ દેશભરના વાચકો સમક્ષ આવ્યા છે. આગામી દિવસોમાં આ સંસ્મરણ ગ્રંથના લોકાર્પણ અને અન્ય અઘોષિત પ્રકરણો અંગે રાજકીય અને સાહિત્યિક વર્તુળોમાં વધુ ચર્ચાઓ થવાની પૂરી સંભાવના છે.