મુંબઈ : મલ્ટી કમોડિટી એક્સચેન્જ કૌભાંડ અને નેશનલ સ્પોટ એક્સચેન્જ લિમિટેડ (NSEL) ના વિવાદમાં ફસાયેલા હજારો રોકાણકારો માટે આખરે એક ખૂબ જ મોટા અને રાહતદાયક સમાચાર સામે આવ્યા છે. મુંબઈની વિશેષ પ્રિવેન્શન ઑફ મની લોન્ડરિંગ એક્ટ (PMLA) કોર્ટે એક મહત્વપૂર્ણ આદેશ જારી કરતા એન્ફોર્સમેન્ટ ડિરેક્ટોરેટ (ED) દ્વારા ટાંચમાં લેવાયેલી આશરે રૂ. ૩,૪૬૪ કરોડની સંપત્તિઓ વેચીને ભંડોળ ઊભું કરવાની સત્તાવાર મંજૂરી આપી દીધી છે. આ સાથે જ આ વેચાણમાંથી પ્રાપ્ત થનારી રકમમાંથી પ્રથમ તબક્કામાં રોકાણકારોના દાવાની પતાવટ પેટે રૂ. ૧,૯૫૦ કરોડ ચૂકવવાનો માર્ગ મોકળો બન્યો છે.

પ્રાપ્ત વિગતો અનુસાર, વર્ષ ૨૦૧૩માં પેમેન્ટમાં થયેલી ચૂક (ડિફોલ્ટ) અને કૌભાંડ બહાર આવ્યા બાદથી દેશભરના હજારો રોકાણકારો છેલ્લાં અંદાજે ૧૩ વર્ષથી પોતાના સખત મહેનતના નાણાં પાછા મેળવવાની આશા સાથે કાનૂની લડાઈ લડી રહ્યા હતા. વિશેષ પીએમએલએ કોર્ટના આ ઐતિહાસિક નિર્ણયથી આ તમામ પીડિત રોકાણકારોમાં ફરી એકવાર આશાનું કિરણ જાગ્યું છે. કોર્ટના આદેશ અનુસાર, સંપત્તિના વેચાણ થકી એકત્રિત થનારી રૂ. ૧,૯૫૦ કરોડ સુધીની રકમ '૬૩ મૂન્સ ટેક્નોલોજીસ લિમિટેડ'ને હસ્તાંતરિત કરવામાં આવશે, જે સંબંધિત રોકાણકારો અને નિર્ધારિત લેણદારોના પ્રતિનિધિ તરીકે આ નાણાં મેળવશે.

નેશનલ કંપની લૉ ટ્રિબ્યુનલ (NCLT) દ્વારા અગાઉ મંજૂર કરવામાં આવેલી સમાધાન યોજનામાં દર્શાવેલી તમામ શરતો પૂર્ણ થતાં જ આ નાણાંની ચુકવણી પ્રક્રિયા હાથ ધરવામાં આવશે. આ યોજના હેઠળ કુલ ૫,૬૮૨ નિર્ધારિત લેણદારોને રૂપિયા ૧,૯૫૦ કરોડ ચૂકવવાનું આયોજન છે. જોકે, આ પ્રક્રિયામાં કાનૂની સ્પષ્ટતા કરતા કોર્ટે જણાવ્યું છે કે જપ્ત કરાયેલી ઘણી સંપત્તિઓ 'મહારાષ્ટ્ર પ્રોટેક્શન ઑફ ઇન્ટરેસ્ટ ઑફ ડિપોઝિટર્સ (MPID) એક્ટ-૧૯૯૯' હેઠળ પણ ટાંચમાં લેવાયેલી છે, તેથી ઇડીએ સંબંધિત સક્ષમ સત્તાધિકારીઓ સાથે પરામર્શ કરીને જ આ પ્રોપર્ટીઝના વેચાણની સમગ્ર પ્રક્રિયા પૂર્ણ કરવી પડશે.

આ ઉપરાંત, અદાલતે એવો પણ મહત્વનો મુદ્દો સ્પષ્ટ કર્યો છે કે જો નિર્ધારિત મિલકતોના વેચાણથી રૂ. ૧,૯૫૦ કરોડ કરતાં વધુ રકમ પ્રાપ્ત થશે, તો તે વધારાની રકમ વિશેષ અદાલતની સીધી દેખરેખ હેઠળ સુરક્ષિત રાખવામાં આવશે. આ વધારાના ભંડોળની અંતિમ પતાવટ અને વિતરણ ભવિષ્યની કાનૂની કાર્યવાહીના આખરી પરિણામ પર આધારિત રહેશે. લાંબા સમયથી ચાલી રહેલા આ આર્થિક વિવાદમાં અદાલતના આ સકારાત્મક હસ્તક્ષેપથી રોકાણકારોને મોટી રાહત મળવાની પૂરી સંભાવના છે.