કોલકાતા, તા.૨૧: તૃણમૂલ કોંગ્રેસ (TMC) ના ફાયરબ્રાન્ડ નેતા અને કૃષ્ણનગરના સાંસદ મહુઆ મોઈત્રાને નફરતભર્યા ભાષણ (Hate Speech) ના કેસમાં કલકત્તા હાઈકોર્ટ તરફથી ખૂબ જ મોટી રાહત મળી છે. હાઈકોર્ટે મંગળવારે સુનાવણી દરમિયાન મોઈત્રા સામે ૫ ઓક્ટોબર ૨૦૨૬ સુધી કોઈપણ પ્રકારની બળજબરીથી કડક કાર્યવાહી અથવા ધરપકડ કરવા પર વચગાળાનો સ્ટે આપી દીધો છે. મહુઆ મોઈત્રાએ કોર્ટમાં દાવો કર્યો હતો કે તેમની સામે નાદિયા જિલ્લાના હોગોલબેરિયા પોલીસ સ્ટેશનમાં નોંધાયેલો આ કેસ સંપૂર્ણપણે બનાવટી અને રાજકીય રીતે પ્રેરિત આરોપો પર આધારિત છે.
જસ્ટિસ સૌગત ભટ્ટાચાર્યની સિંગલ બેંચે આ ચુકાદો આપતા મહુઆ મોઈત્રાને ૧૪ ઓગસ્ટના રોજ તપાસ અધિકારી સમક્ષ રૂબરૂ હાજર થઈને તપાસમાં પૂર્ણ સહકાર આપવાનો આદેશ આપ્યો છે. કોર્ટે સ્પષ્ટ કર્યું છે કે જો તેઓ તપાસમાં સહકાર આપશે તો ઓક્ટોબર સુધી અથવા આગળના આદેશ સુધી તેમની સામે કોઈ કડક પગલાં લેવામાં આવશે નહીં.
સંસદ સત્રના કારણે વર્ચ્યુઅલ હાજરી અને ઈંડા ફેંકવા સામે સુરક્ષા
મહુઆ મોઈત્રાના વકીલ અયાન ભટ્ટાચાર્યએ કોર્ટ સમક્ષ રજૂઆત કરી હતી કે તેમની અસીલ પર ભારતીય ન્યાય સંહિતા (BNS) ની જે કલમો લગાવવામાં આવી છે તેમાં મહત્તમ સજા સાત વર્ષથી ઓછી છે, જેથી તેઓ કાનૂની રક્ષણ મેળવવા માટે હકદાર છે. તેમણે વધુમાં જણાવ્યું કે સાંસદ હાલ નવી દિલ્હીમાં સંસદના ચોમાસુ સત્રમાં વ્યસ્ત છે જે ૧૩ ઓગસ્ટ સુધી ચાલશે. તેથી તેઓ ૧૩ ઓગસ્ટ સુધી ઓનલાઈન/વર્ચ્યુઅલ મોડમાં તપાસ અધિકારી સામે હાજર થઈ શકશે અને ૧૪ ઓગસ્ટે રૂબરૂ પહોંચશે.
આ સુનાવણી દરમિયાન એક રસપ્રદ વળાંક ત્યારે આવ્યો જ્યારે મોઈત્રાના વકીલે કોર્ટ પાસે વિશેષ સુરક્ષા માંગતા વિનંતી કરી કે જ્યારે તેમની અસીલ તપાસ એજન્સી કે પોલીસ સ્ટેશન સમક્ષ હાજર થાય ત્યારે વિરોધીઓ દ્વારા તેમના પર "ઈંડા ફેંકવામાં ન આવે" તેની તકેદારી રાખવા પોલીસને નિર્દેશ આપવામાં આવે.
રાજ્ય સરકારનો વિરોધ: 'ચાર વાર સમન્સ છતાં હાજર ન થયા'
બીજી તરફ, પશ્ચિમ બંગાળ સરકાર વતી હાજર રહેલા એડવોકેટ જનરલ સુરોજિત નાથ મિત્રાએ આ અરજીનો સખત વિરોધ કર્યો હતો. તેમણે કોર્ટને જણાવ્યું હતું કે મહુઆ મોઈત્રાને અગાઉ ચાર વખત તપાસ અધિકારી સમક્ષ હાજર થવા માટે કાનૂની નોટિસ મોકલવામાં આવી હતી, પરંતુ તેમણે એક પણ નોટિસનું પાલન કર્યું નથી.
તમામ પક્ષોની દલીલો સાંભળ્યા બાદ જસ્ટિસ ભટ્ટાચાર્યએ ૧૪ ઓગસ્ટે હાજરી નોંધાવવાની શરતે આ રાહત આપી છે અને આ કેસની આગામી સુનાવણી ૧ ઓક્ટોબર ૨૦૨૬ ના રોજ નિયત કરી છે.