વાશિંગ્ટન : અમેરિકાના વિદેશ વિભાગ દ્વારા એક મહત્વનું અપડેટ આંતરરાષ્ટ્રીય સ્તરે સામે આવ્યું છે, જેમાં ૫૦ દેશોના નાગરિકોએ બિઝનેસ અને ટુરિસ્ટ વિઝા (B1/B2) માટે ૨૦ હજાર ડૉલર સુધીના વિઝા બોન્ડ જમા કરાવવાના રહેશે, પરંતુ રાહતની વાત એ છે કે આ યાદીમાં ભારતનો સમાવેશ કરવામાં આવ્યો નથી. અમેરિકા દ્વારા જાહેર કરાયેલા આ કડક કાર્યક્રમનો મુખ્ય ઉદ્દેશ એવા દેશોના નાગરિકો પર અંકૂશ મુકવાનો છે કે જેમના ત્યાંથી અમેરિકા જતા લોકો નિયત સમય કરતા વધારે સમય એટલે કે ઓવરસ્ટે કરતા હોય છે.

ડિપાર્ટમેન્ટ ઓફ હોમલેન્ડ સિક્યોરિટીના ઓવરસ્ટે રિપોર્ટના આધારે લેવાયેલા આ નિર્ણય અંતર્ગત યાદીમાં સામેલ દેશોના યાત્રીઓએ કોન્સુલર ઓફિસરના દિશા-નિર્દેશ પ્રમાણે ૧૦ હજાર, ૧૫ હજાર અથવા ૨૦ હજાર ડૉલર એટલે કે આશરે ૮થી ૧૬ લાખ રૂપિયા સુધીના બોન્ડ જમા કરવા પડશે. ભારતને આ કડક શરતોમાંથી મુક્તિ મળી છે, જોકે પાડોશી દેશો જેવા કે બાંગ્લાદેશ, ભૂટાન અને નેપાળ જેવા દક્ષિણ એશિયાના દેશોને આ યાદીમાં સામેલ કરવામાં આવ્યા છે.

આ વ્યવસ્થા હેઠળ નિયત કરાયેલા દેશોના મુસાફરોએ યુનાઇટેડ સ્ટેટ્સમાં પ્રવેશવા અને પાછા ફરવા માટે ફક્ત વાણિજ્યિક વિમાનો અને અધિકૃત એરપોર્ટનો જ ઉપયોગ કરવો પડશે, અને તેઓ ચાર્ટર ફ્લાઇટ્સ કે દરિયાઈ બંદરોનો ઉપયોગ કરી શકશે નહીં. જો તમામ શરતોનું યોગ્ય પાલન કરવામાં આવે તો આ બોન્ડની રકમ પરત કરવામાં આવે છે, તેમ છતાં સામાન્ય મુસાફરો અને પ્રવાસીઓ માટે આ જટિલ પ્રક્રિયા આર્થિક રીતે અત્યંત પડકારજનક સાબિત થઈ રહી છે.

ભૂતકાળમાં પણ અમેરિકા દ્વારા વિઝા પ્રક્રિયા અને ઇમિગ્રેશનના નિયમોને વધુ કડક બનાવવા માટે સમયાંતરે આ પ્રકારના નીતિગત પગલાં લેવામાં આવતા રહ્યા છે, જેના કારણે ઓવરસ્ટેની સમસ્યા ધરાવતા દેશો પર દબાણ વધ્યું છે. આગામી સમયમાં આ નવા વિઝા બોન્ડ પ્રોટોકોલની વૈશ્વિક મુસાફરી પર કેવી અસરો પડે છે અને અન્ય દેશો દ્વારા તેના પર શું પ્રતિક્રિયા આપવામાં આવે છે તેના પર સૌની નજર રહેશે.