મુંબઈ: બોમ્બે હાઈકોર્ટે મંગળવારે HDFC બેંકના મેનેજિંગ ડિરેક્ટર અને CEO શશિધર જગદીશન વિરુદ્ધ નોંધાયેલી ૨ કરોડ રૂપિયાની લાંચની FIR ને રદ કરવાનો આદેશ આપ્યો છે. મુંબઈની જાણીતી લીલાવતી હોસ્પિટલનું સંચાલન કરતા 'લીલાવતી કીર્તિલાલ મહેતા મેડિકલ ટ્રસ્ટ' દ્વારા આ ફરિયાદ કરવામાં આવી હતી, જેને કોર્ટે દૂષિત ઈરાદાવાળી ગણાવી છે.
શું હતા આક્ષેપો?
લીલાવતી ટ્રસ્ટના ટ્રસ્ટી પ્રશાંત કિશોર મહેતાએ એવો આક્ષેપ કર્યો હતો કે, હોસ્પિટલના ભૂતપૂર્વ ટ્રસ્ટીઓના એક જૂથને ટ્રસ્ટ પર ગેરકાયદેસર અંકુશ જાળવી રાખવામાં મદદ કરવા બદલ શશિધર જગદીશને ૨.૦૫ કરોડ રૂપિયાની લાંચ લીધી હતી. આ ફરિયાદમાં એવી પણ દલીલ કરવામાં આવી હતી કે લોન રિકવરી દરમિયાન મળેલી એક ડાયરીમાં આ ચુકવણીનો ઉલ્લેખ હતો.
કોર્ટે ફટકાર લગાવી: "આ વેરવૃત્તિ છે"
જસ્ટિસ એમ.એસ. કર્ણિક અને એન.આર. બોરકરની ડિવિઝન બેન્ચે અવલોકન કર્યું હતું કે, આ ફરિયાદ માત્ર બેંક દ્વારા કરવામાં આવતી રિકવરીની કાર્યવાહીનો વળતો પ્રહાર (Counterblast) છે. હકીકતમાં, HDFC બેંકે મહેતા પરિવારની કંપની 'સ્પ્લેન્ડર જેમ્સ લિમિટેડ' પાસેથી ૬૫.૨૨ કરોડ રૂપિયા વસૂલવા માટે કાનૂની કાર્યવાહી શરૂ કરી હતી. કોર્ટે સ્પષ્ટ કર્યું કે આ ફરિયાદ 'બોનાફાઇડ' (સત્યનિષ્ઠ) નથી અને તપાસ ચાલુ રાખવી એ કોર્ટની પ્રક્રિયાનો દુરુપયોગ ગણાશે.
શેરબજાર પર અસર
આ કાયદાકીય વિવાદની વચ્ચે મંગળવારે શેરબજારમાં HDFC બેંકના શેરમાં ઘટાડો જોવા મળ્યો હતો. BSE પર બેંકનો શેર ૦.૬૯% (રૂ. ૫.૩૫) ઘટીને ૭૭૨.૫૫ પર બંધ રહ્યો હતો. જોકે, કોર્ટના આ આદેશ બાદ બેંક મેનેજમેન્ટ અને રોકાણકારોએ રાહતનો શ્વાસ લીધો છે.
પારિવારિક વિવાદમાં બેંક ફસાઈ
હાઈકોર્ટે નોંધ્યું હતું કે ટ્રસ્ટના વર્તમાન અને ભૂતપૂર્વ ટ્રસ્ટીઓ વચ્ચે ગંભીર અવિશ્વાસ અને કડવાશ છે. આ પારિવારિક ઝઘડાના મોજાં બેંક અધિકારી સુધી પહોંચ્યા હતા. કોર્ટે એ પણ નકારી કાઢ્યું હતું કે ટ્રસ્ટના સ્થાપક કિશોર મહેતાના મૃત્યુ માટે બેંકના દબાણને જવાબદાર ગણી શકાય.
આ ચુકાદા સાથે શશિધર જગદીશન પર લટકતી ધરપકડ અને તપાસની તલવાર હવે હટી ગઈ છે.