મિયામી : અમેરિકન રાજકારણમાં ગરમાવો લાવતા એક મોટા સમાચાર સામે આવ્યા છે, જ્યાં ફેડરલ જજે ડોનાલ્ડ ટ્રમ્પ દ્વારા બીબીસી સામે દાખલ કરવામાં આવેલા ૧૦ અબજ ડૉલરના માનહાનિના મુકદ્દમાને આગળ વધારવાની મંજૂરી આપી દીધી છે. ફેડરલ જજ જેફરી ટી કુન્ટ્ઝે બ્રિટિશ બ્રોડકાસ્ટરની કેસ રદ કરવાની દરખાસ્તને આંશિક રીતે ફગાવી દીધી છે, જેના કારણે ટ્રમ્પ માટે આ કેસમાં કાનૂની લડત લડવાનો રસ્તો સાફ થઈ ગયો છે.
આ વિવાદ ૬ જાન્યુઆરીના યુએસ કેપિટોલ હુમલા પહેલાં બીબીસીની પેનોરમા ડોક્યુમેન્ટરી "ટ્રમ્પ: અ સેકન્ડ ચાンス" માં ટ્રમ્પના નિવેદનોને અલગ-અલગ સમયે બોલાયેલા હોવા છતાં એકસાથે એડિટ કરીને રજૂ કરવાથી શરૂ થયો હતો. આ બે નિવેદનો વચ્ચે લગભગ ૫૫ મિનિટનું અંતર હોવા છતાં તેને એકસાથે જોડી દેવાયા હતા, જે મામલે બીબીસી અગાઉ માફી પણ માગી ચૂકી છે. ન્યાયાધીશે અવલોકન કર્યું છે કે આ પ્રકારનું સંપાદન માત્ર સામાન્ય એડિટિંગ નથી પરંતુ તે વાસ્તવિક દ્વેષ અને બદનક્ષીની સંભાવના ઊભી કરે છે.
કોર્ટે સ્પષ્ટ કર્યું છે કે ટ્રમ્પે પૂરતા પુરાવા રજૂ કર્યા છે કે બીબીસીનું આ પગલું માત્ર બેદરકારી ન હતી પરંતુ પત્રકારત્વના ધોરણોથી મોટો ભ્રમ ફેલાવવાનો પ્રયાસ હતો. જોકે, ન્યાયાધીશે ટ્રમ્પના ફ્લોરિડાના ભ્રામક વ્યાપાર વ્યવહાર અધિનિયમના ઉલ્લંઘનના દાવાને ફગાવી દીધો છે અને પ્રસારણથી વાસ્તવિક નુકસાન થયું હોવાનું સાબિત કરવા જણાવ્યું છે. આ ચુકાદાને ટ્રમ્પે પોતાની "મોટી જીત" ગણાવી છે જ્યારે બીબીસીએ પોતાની કાનૂની સ્થિતિ મજબૂત હોવાનો વિશ્વાસ વ્યક્ત કર્યો છે.
આ કાનૂની લડાઈના આગામી તબક્કા હેઠળ, ટ્રમ્પને ૧૧ ડિસેમ્બર સુધીમાં બીબીસીના વકીલો સમક્ષ જુબાની આપવા હાજર રહેવા આદેશ અપાયો છે, અન્યથા તેમના પર પ્રતિબંધો આવી શકે છે. ટ્રાયલ દરમિયાન ટ્રમ્પે કાનૂની ધોરણ મુજબ એ સાબિત કરવું પડશે કે બીબીસીએ ખરેખર દ્વેષપૂર્ણ ભાવનાથી આ કૃત્ય કર્યું હતું, જે આગામી સમયમાં આંતરરાષ્ટ્રીય સ્તરે ચર્ચાનો મોટો વિષય બનશે.