નવી દિલ્હી: આગામી તહેવારોની મોસમ પહેલા ગ્રાહકો માટે રાહતના સમાચાર આવ્યા છે. દેશભરમાં ખાંડનો સરેરાશ છૂટક ભાવ સતત ચોથા દિવસે પ્રતિ કિલોગ્રામ રૂ. ૬૦ ની નીચે નોંધાયો છે. તાજેતરમાં ખાંડના ભાવમાં થયેલા વધારા બાદ કેન્દ્ર સરકારે લીધેલા ત્વરિત કડક પગલાં અને આયાતને આપેલી મંજૂરીના કારણે ભાવ પર અંકુશ મેળવવામાં સફળતા મળી છે.

ગ્રાહક બાબતોના મંત્રાલય દ્વારા જાહેર કરાયેલા સત્તાવાર ડેટા અનુસાર, સોમવારે દેશમાં ખાંડનો સરેરાશ છૂટક ભાવ રૂ. ૫૯.૫૭ પ્રતિ કિલો રહ્યો હતો, જે શુક્રવારથી સતત રૂ. ૬૦ ની નીચે જાળવી રખાયો છે. ૨૧ ઓગસ્ટના રોજ કેન્દ્ર સરકારે સ્થાનિક બજારમાં સ્વીટનરના ભાવ નિયંત્રિત કરવા માટે આયાતની મંજૂરી આપી હતી અને સ્ટોક લિમિટના નિયમો કડક કર્યા હતા, ત્યારબાદથી ભાવમાં નરમ વલણ જોવા મળી રહ્યું છે.

સરકારે ખાંડ મિલો, જથ્થાબંધ વપરાશકારો અને ડીલરો માટે સંગ્રહ મર્યાદા (સ્ટોક લિમિટ) અત્યંત કડક બનાવી દીધી છે. સરકાર મુજબ દેશમાં વાર્ષિક સ્થાનિક માંગ ૨૮ થી ૨૮.૫ મિલિયન ટન રહેવાનો અંદાજ છે, જેની સામે પૂરતો ભંડાર ઉપલબ્ધ છે. જોકે, સરકારે ૨૦૨૫-૨૬ માર્કેટિંગ વર્ષ (ઓક્ટોબર-સપ્ટેમ્બર) માટે ખાંડના ઉત્પાદનનો અંદાજ અગાઉના ૩૪.૩ મિલિયન ટનથી ઘટાડીને ૩૦.૬ મિલિયન ટન કર્યો છે. સરકારી પગલાંના કારણે તહેવારોના દિવસોમાં ભાવ નિયંત્રણમાં રહેશે તેવી આશા સેવાઈ રહી છે.