પટના :બિહારના રાજકારણમાં એકાએક ભારે ભૂકંપ સર્જાયો છે, જ્યાં સ્વતંત્ર MLC તરીકે વિધાન પરિષદની ચૂંટણી જીતનારા બંશીધર બ્રજવાસી અને રાહુલ રાજે શનિવારે ભારતીય જનતા પાર્ટી (BJP) ને સમર્થન જાહેર કરતાની સાથે જ ભારે રાજકીય ગરમાવો આવી ગયો છે. પટના સ્થિત રાજ્ય ભાજપ કાર્યાલય ખાતે મુખ્યમંત્રી સમ્રાટ ચૌધરી અને શિક્ષણ મંત્રી મિથિલેશ તિવારીની ઉપસ્થિતિમાં આ બંને નેતાઓએ પાર્ટી સભ્યપદની સ્લિપ સ્વીકારી હોવાના દાવાઓ અને ફોટા સામે આવ્યા હતા. જો કે, વિપક્ષો દ્વારા આ પગલું ગેરબંધારણીય હોવાનું જણાવીને સભ્યપદ રદ કરવાની ધમકી આપતા જ રાજકીય સમીકરણો પલટાઈ ગયા હતા અને બંને નેતાઓની વિધાન પરિષદની સભ્યપદ પર તલવાર લટકી ગઈ છે.

આ સમગ્ર વિવાદ વણસતા તિરુટ ગ્રેજ્યુએટ્સ બેઠક પરથી બીજી વખત વિજયી બનેલા બંશીધર બ્રજવાસીએ તાત્કાલિક યુ-ટર્ન લીધો હતો અને ફેસબુક પર લાઈવ થઈને સ્પષ્ટતા કરી હતી કે તેઓ વિધિવત રીતે ભાજપમાં જોડાયા નથી, પરંતુ માત્ર શિક્ષકોના પ્રશ્નોના નિરાકરણ માટે સરકારને બહારથી ટેકો આપ્યો છે. બીજી તરફ, સારણ શિક્ષક બેઠકના સ્વતંત્ર MLC રાહુલ રાજે શરૂઆતમાં પાર્ટી સાથે લાંબા સંબંધો હોવાનું સ્વીકાર્યું હતું, પરંતુ ભાજપ દ્વારા બાદમાં બંને નેતાઓ પાર્ટીમાં ન જોડાયા હોવાનું નિવેદન આપતા રાહુલ રાજે રહસ્યમય મૌન ધારણ કરી લીધું છે.

આ ઘટનાક્રમ બાદ વિપક્ષી પક્ષો આક્રમક મુદ્રામાં આવી ગયા છે. રાષ્ટ્રીય જનતા દળ (RJD) ના પ્રવક્તા શક્તિ સિંહ યાદવે ભાજપ પર બંધારણ અને લોકશાહીની મજાક ઉડાવવાનો ગંભીર આક્ષેપ કર્યો છે, જ્યારે પ્રશાંત કિશોરની જન સૂરજ પાર્ટીના વરિષ્ઠ વકીલ કુમાર અમિતે ભારતના બંધારણની દસમી અનુસૂચિના ફકરા ૨(૨) અને અનુચ્છેદ ૧૯૧(૨) ટાંકીને દાવો કર્યો છે કે ચૂંટણી પછી કોઈ પણ અપક્ષ સભ્ય પક્ષમાં જોડાય તો તેનું સભ્યપદ રદ થવું નિશ્ચિત છે અને જન સૂરજ આ બાબતે વિધાન પરિષદના અધ્યક્ષ સમક્ષ સત્તાવાર ફરિયાદ કરશે.

ખાસ નોંધનીય બાબત એ છે કે આ બંને સ્વતંત્ર MLC એ તાજેતરની ચૂંટણીમાં સત્તાધારી પક્ષના જ સાથી ઘટક દલ એવા જનતા દળ (યુનાઇટેડ) - JDU ના ઉમેદવારોને જ હરાવીને જીત મેળવી હતી, જેથી શાસક ગઠબંધનમાં પણ આંતરિક ખટરાગના એંધાણ વર્તાયા છે. જો આગામી દિવસોમાં આ મામલે વિધાન પરિષદના અધ્યક્ષ કે હાઈકોર્ટમાં કાયદાકીય લડાઈ તીવ્ર બને છે, તો બિહારના રાજકારણમાં નવો વળાંક આવી શકે છે અને બંને સભ્યોએ ભવિષ્યમાં મોટી રાજકીય કિંમત ચૂકવવી પડી શકે છે.