તા. ૨૧ ઓગષ્ટ ર૦ર૬ વિક્રમ સંવત ર૦૮૨ શ્રાવણ સુદ – ૯ શુક્રવાર
News of Wednesday, 18th November 2026
મધ્ય પૂર્વના યુદ્ધ વચ્ચે ભારત માટે રાહતના મોટા સમાચાર: ૧૦ વર્ષથી બંધ ઇરાકની વિશાળ તેલ પાઇપલાઇન પુનઃ કાર્યરત
હોર્મુઝની નાકાબંધી અને તેલ સંકટ વચ્ચે કિર્કુક-સેહાન માર્ગ ખુલવાથી ભારત સહિત વૈશ્વિક બજારને મળશે રોજ લાખો બેરલ ક્રૂડ ઓઇલ : પેટ્રોલ-ડીઝલના ભાવ નિયંત્રણમાં રહેવાની સાથે અર્થતંત્રને મળશે મોટું બૂસ્ટર

નવી દિલ્હી : પશ્ચિમ એશિયામાં ચાલી રહેલા તીવ્ર યુદ્ધ અને હોર્મુઝ સ્ટ્રેટના દરિયાઈ માર્ગ પર અંકુશ વચ્ચે ભારત માટે ખૂબ જ રાહતજનક અને ઉત્સાહવર્ધક સમાચાર સામે આવ્યા છે. ભારતના ત્રીજા સૌથી મોટા ક્રૂડ ઓઇલ સપ્લાયર એવા ઇરાકે એક દાયકા એટલે કે ૧૦ વર્ષથી લાંબો સમય બંધ રહેલી પોતાની ૯૬૦ કિલોમીટર લાંબી 'કિર્કુક-સેહાન' તેલ પાઇપલાઇનને સત્તાવાર રીતે ફરીથી ખુલ્લી મૂકી દીધી છે. ઇરાકના તેલ મંત્રી દ્વારા ૧૭ નવેમ્બરના રોજ કરવામાં આવેલી આ જાહેરાત અનુસાર, ઇરાકથી તુર્કીના ભૂમધ્ય બંદર સેહાન સુધી જતી આ પાઇપલાઇન દ્વારા શરૂઆતમાં દરરોજ ૧,૨૦,૦০০ બેરલ ક્રૂડ ઓઇલનું પરિવહન શરૂ થઈ ગયું છે, જે આગામી સમયમાં વધીને ૫,૦૦,૦૦૦ બેરલ પ્રતિદિન સુધી પહોંચશે. આ જમીન માર્ગે શરૂ થયેલા પુરવઠાથી દરિયાઈ નાકાબંધીની અસર નાબૂદ થશે અને વૈશ્વિક બજારમાં તેલની અછતનો મોટો ખતરો ટળી ગયો છે.
ભારત તેની ક્રૂડ ઓઇલની કુલ જરૂરિયાતના ૮૫ ટકાથી વધુ તેલ વિદેશથી આયાત કરે છે, જેમાં રશિયા અને યુએઈ પછી ઇરાક ભારતનો મહત્વપૂર્ણ ભાગીદાર છે. હોર્મુઝ સ્ટ્રેટ બંધ થવાને કારણે ઇરાકનું તેલ નિકાસ અટવાયું હતું અને દેશ ગંભીર આર્થિક સંકટમાં મુકાયો હતો, કારણ કે ઇરાકનું ૯૦ ટકા બજેટ તેલની આવક પર નિર્ભર છે. આ નવી પાઇપલાઇન શરૂ થવાથી હવે ભારત ભૂમધ્ય સમુદ્ર દ્વારા પોતાના ટેન્કરો મોકલીને સીધા તુર્કીના બંદરેથી સરળતાથી તેલ મેળવી શકશે. વૈશ્વિક બજારમાં અચાનક લાખો બેરલ વધારાનું તેલ ઠલવાવાથી ક્રૂડ ઓઇલના આંતરરાષ્ટ્રીય ભાવ નિયંત્રણમાં રહેશે, જે આડકતરી રીતે ભારત માટે મોંઘવારી સામે રક્ષણ પૂરું પાડશે.
આ પુરવઠો સ્થિર રહેવાથી ભારતીય તેલ વિતરણ કંપનીઓ પરનું નાણાકીય દબાણ ઘટશે, જેના પરિણામે દેશમાં પેટ્રોલ અને ડીઝલના ભાવ સ્થિર રહેવાની પૂરી સંભાવના છે. ઇંધણના ભાવ કાબૂમાં રહેવાથી માલસામાનનું પરિવહન સસ્તું બનશે અને સામાન્ય નાગરિકોને રોજિંદી વસ્તુઓમાં વધતા ફુગાવા સામે મોટી રાહત મળશે. આ ઉપરાંત, આયાત બિલ નિયંત્રણમાં રહેવાથી ભારતનું વિદેશી હૂંડિયામણ બચશે અને વૈશ્વિક બજારમાં ભારતીય રૂપિયાની સ્થિતિ પણ વધુ મજબૂત બનશે, જે દેશના સમગ્ર અર્થતંત્ર માટે અત્યંત ફાયદાકારક સાબિત થશે.
(6:31 PM IST)









છેલ્લા 8 દિવસમાં સૌથી લોકપ્રિય 
