નવી દિલ્હી:  કેન્સર જેવા અસાધ્ય અને ઘાતક રોગની સારવાર લઈ રહેલા કરોડો દર્દીઓ માટે કેન્દ્ર સરકારે એક અત્યંત રાહતજનક કાનૂની અને આર્થિક પ્રસ્તાવ રજૂ કર્યો છે. કેન્દ્ર સરકારે સુપ્રીમ કોર્ટને સત્તાવાર માહિતી આપતા જણાવ્યું છે કે દવાઓના આડેધડ ભાવ અને મનસ્વી માર્કઅપને અટકાવવા માટે કેન્સરની દવાઓ પર ૩૦ ટકા ટ્રેડ માર્જિન મર્યાદા (કેપ) લાદવાનો નિર્ણય લેવામાં આવ્યો છે. સર્વોચ્ચ અદાલતમાં કેન્દ્ર સરકાર તરફથી સોલિસિટર જનરલ તુષાર મહેતાએ સ્પષ્ટ કર્યું હતું કે સરકાર ૩૦% ની મર્યાદાને આધીન હોય તેવી કેન્સર વિરોધી દવાઓની ખાસ યાદી ટૂંક સમયમાં બહાર પાડશે અને બજારની જરૂરિયાત મુજબ તેમાં સુધારો પણ કરશે.

સરકારના આ ક્રાંતિકારી પ્રસ્તાવથી કેન્સરની દવાઓના મેક્સિમમ રિટેલ પ્રાઇસ (MRP) માં આશરે ૨૦ થી ૭૦ ટકા સુધીનો મોટો ભાવઘટાડો થવાની પૂરી શક્યતા છે. આ નિર્ણયથી દર્દીઓને વાર્ષિક અંદાજે ૨,૫૦૦ કરોડ રૂપિયાની જંગી આર્થિક બચત થશે અને દેશભરમાં દવાઓની ઉપલબ્ધતામાં પણ મોટો વધારો થશે. જોકે, સુપ્રીમ કોર્ટના જસ્ટિસ વિક્રમ નાથ અને જસ્ટિસ સંદીપ મહેતાની ખંડપીઠે આ પ્રસ્તાવ પર ટિપ્પણી કરતા જણાવ્યું હતું કે માત્ર કેન્સરની દવાઓ પૂરતી મર્યાદા રાખવી નાની બાબત છે, પરંતુ આખા ફાર્માસ્યુટિકલ માર્કેટમાં દવાઓની કિંમતોનું વ્યાપક ઓડિટ થવું જોઈએ.

સુનાવણી દરમિયાન સુપ્રીમ કોર્ટે ચોંકાવનારા ઉદાહરણો ટાંકીને પ્રશ્ન પૂછ્યો હતો કે કેટલીક દવાઓની એમઆરપી (MRP) રિટેલરની મૂળ કિંમત કરતાં ૪૦૦ ગણી વધારે કેમ નક્કી કરવામાં આવે છે? અદાલતે તમામ નોન-શિડ્યુલ્ડ અને હોસ્પિટલ યુઝની દવાઓ પર સ્ટાન્ડર્ડ ૧૬% રિટેલ માર્જિન લાગુ કરવાનો નિર્દેશ આપ્યો હતો. તેની સામે સોલિસિટર જનરલ તુષાર મહેતાએ દલીલ કરી હતી કે કિંમત અને દવાઓની બજારમાં ઉપલબ્ધતા વચ્ચે સંતુલન હોવું જરૂરી છે. અતિશય દખલગીરીથી બજાર અને સપ્લાય ચેઇનને નુકસાન થઈ શકે છે. સુપ્રીમ કોર્ટે હવે આ મહત્વપૂર્ણ મામલે આગામી સુનાવણી ૨૭ ઓક્ટોબરના રોજ નક્કી કરી છે.