મેડ્રિડ : રોજગારી અને સારા ભવિષ્યની શોધમાં યુરોપ તરફ આકર્ષાતા દુનિયાભરના સ્થળાંતર કરનારાઓ (Migrants) માટે સ્પેન સરકારે એક અત્યંત મહત્વપૂર્ણ અને ઐતિહાસિક રાહતની જાહેરાત કરી છે. સ્પેનની વર્તમાન કાયદેસરકરણ (Regularization) યોજના હેઠળ કાનૂની દરજ્જો મેળવવા માટે અરજી કરનારા આશરે ૬ લાખથી વધુ સ્થળાંતર કરનારાઓને સરકારે મોટી ભેટ આપી છે. સત્તાવાર અહેવાલો મુજબ, આ તમામ લોકોને તેમની રહેઠાણ (Residence) ની મુખ્ય અરજીઓ પર અંતિમ નિર્ણય ન આવે ત્યાં સુધી કામચલાઉ ધોરણે કાયદેસર રીતે દેશમાં કામ કરવાની મંજૂરી આપતી સ્પેશિયલ વર્ક પરમિટ જારી કરવામાં આવી છે. સરકારના આ માનવતાવાદી પગલાથી બિનદસ્તાવેજીકૃત શ્રમિકો હવે છૂપાવાને બદલે સ્પેનના ઔપચારિક અર્થતંત્રનો ભાગ બની શકશે.
સ્પેન સરકારના માઇગ્રેશન રાજ્ય સચિવ પિલર કેન્સેલા અને સામાજિક સુરક્ષા રાજ્ય સચિવ બોર્જા સુઆરેઝ દ્વારા સંયુક્ત રીતે આપવામાં આવેલી માહિતી અનુસાર, આ વિશેષ માફી ઝુંબેશ (Amnesty Campaign) હેઠળ કાનૂની દરજ્જો મેળવવા માટે કુલ ૧.૧૭ મિલિયન (૧૧.૭ લાખ) થી વધુ સ્થળાંતર કરનારાઓએ અરજી કરી હતી. જેમાંથી પ્રાથમિક તબક્કે ૬,૦૯,૭૩૭ લોકોને કામચલાઉ વર્ક પરમિટ સોંપી દેવામાં આવી છે. આ આંકડો સરકારના પ્રારંભિક અંદાજ (૫ લાખ) કરતાં બમણો નોંધાયો છે. આ યોજનામાં મુખ્યત્વે લેટિન અમેરિકન દેશોના નાગરિકોએ ભાગ લીધો છે. રસપ્રદ વાત એ છે કે, જૂનના અંત સુધીમાં આમાંથી અંદાજે ૧,૬૦,૦૦૦ જેટલા લોકોને સ્પેનમાં સત્તાવાર રીતે રોજગાર પણ મળી ચૂક્યો છે, જે દેશની અર્થવ્યવસ્થા માટે સકારાત્મક સંકેત છે.
શું છે આ વિશેષ યોજનાના નિયમો અને કોને મળશે લાભ?
સ્પેન સરકારની આ લોકપ્રિય યોજનામાં અરજી કરવા માટે કેટલીક કડક શરતો પણ રાખવામાં આવી હતી. આ ઝુંબેશ ચાલુ વર્ષે ૧૬ એપ્રિલથી શરૂ થઈને ૩૦ જૂન સુધી ખુલ્લી રાખવામાં આવી હતી. આમાં એવા જ બિનદસ્તાવેજીકૃત સ્થળાંતર કરનારાઓને પાત્ર ગણવામાં આવ્યા છે, જેઓ વર્ષ ૨૦૨૫ ના અંત પહેલા ઓછામાં ઓછા પાંચ મહિનાથી સ્પેનમાં વસવાટ કરી રહ્યા હોય અને તેમનો કોઈપણ પ્રકારનો ગુનાહિત રેકોર્ડ (Criminal Record) ન હોય. જે નાગરિકો આ માપદંડમાં ખરા ઉતરશે, તેમને વહીવટી પ્રક્રિયા પૂર્ણ થયા બાદ એક વર્ષની નવીનીકરણ કરી શકાય તેવી (Renewable) કાયમી નિવાસ પરમિટ આપવામાં આવશે. અત્યાર સુધીમાં આવા ૧૧,૦૦૦ લોકોને કાયમી પરમિટ એનાયત પણ કરી દેવામાં આવી છે.
મુખ્ય ક્ષેત્રોમાં નોકરીઓ આપવા ઉદ્યોગો સાથે ભાગીદારી
સ્પેનની અર્થવ્યવસ્થામાં શ્રમિકોની તંગીને દૂર કરવા માટે સરકાર આ યોજનાનો ખૂબ જ સ્માર્ટ ઉપયોગ કરી રહી છે. હાલમાં સ્પેન સરકાર બાંધકામ (Construction), પર્યટન (Tourism), પરિવહન (Transport) અને હોસ્પિટાલિટી કે સંભાળ (Care Sectors) જેવા મહત્વના ક્ષેત્રોના મોટા વ્યવસાયો અને સંગઠનો સાથે સીધી ભાગીદારી કરી રહી છે. આ ભાગીદારીનો હેતુ વહેલી તકે સ્થળાંતર કરનારાઓની કુશળતાના આધારે તેમને યોગ્ય નોકરીઓ સાથે જોડવાનો છે. સરકારી આંકડા દર્શાવે છે કે આ યોજના હેઠળ કાનૂની દરજ્જો મેળવવા માંગતા લોકોમાં ૮૧ ટકા લોકો ૪૫ વર્ષથી ઓછી ઉંમરના યુવાનો છે, જે દેશના શ્રમ બજારને નવી ઉર્જા આપશે. આ ઉપરાંત અરજદારોમાં પુરુષોની સંખ્યા ૫૭ ટકા જેટલી નોંધાઈ છે.