નવી દિલ્હી | તા.31: ટ્રેનમાં વધુ સામાન સાથે મુસાફરી કરતા મુસાફરો માટે ભારતીય રેલ્વેએ એક અત્યંત રાહતજનક અને ડિજિટલ સુવિધાની શરૂઆત કરી છે. હવે મુસાફરો ટ્રેન ટિકિટ બુક કરાવતી વખતે જ પોતાના વધારાના સામાન (એક્સેસ બેગેજ) નું બુકિંગ અને ચુકવણી ઓનલાઈન કરી શકશે. રેલ્વેના આ ક્રાંતિકારી પગલાથી મુસાફરોને બોર્ડિંગ પહેલાં સ્ટેશન પર પાર્સલ ઓફિસના ધક્કા ખાવામાંથી અને કાગળકામની લાંબી ઝંઝટમાંથી કાયમી મુક્તિ મળશે.

આ નવી સુવિધાનો લાભ માત્ર કન્ફર્મ ટિકિટ ધરાવતા મુસાફરો જ મેળવી શકશે. નિયમો અનુસાર, એસી ફર્સ્ટ ક્લાસ, એસી ટુ-ટાયર, ફર્સ્ટ ક્લાસ, સ્લીપર ક્લાસ અને સેકન્ડ ક્લાસના મુસાફરો પોતાના નિર્ધારિત ફ્રી લિમિટથી વધુ સામાન માટે ઓનલાઈન બુકિંગ કરી શકશે. જોકે, એસી 3-ટાયર અને એસી ચેર કારના મુસાફરો માટે આ સુવિધા ઉપલબ્ધ રહેશે નહીં, કારણ કે આ વર્ગોમાં મંજૂર મહત્તમ સામાન મર્યાદા ફ્રી લિમિટ (40 કિલો) જેટલી જ રાખવામાં આવી છે.

વર્ગ અનુસાર સામાનની મર્યાદા અને કદ:

·         એસી ફર્સ્ટ ક્લાસ: 70 કિલો ફ્રી (મહત્તમ 150 કિલો સુધી બુક કરી શકાશે).

·         એસી 2-ટાયર & ફર્સ્ટ ક્લાસ: 50 કિલો ફ્રી (મહત્તમ 100 કિલો).

·         સ્લીપર ક્લાસ: 40 કિલો ફ્રી (મહત્તમ 80 કિલો).

·         સેકન્ડ ક્લાસ: 35 કિલો ફ્રી (મહત્તમ 70 કિલો).

સામાનના વજન ઉપરાંત રેલ્વેએ કદની મર્યાદા પણ નક્કી કરી છે. સામાન્ય કોચ માટે સામાનનું કદ 100 સેમી × 60 સેમી × 25 સેમી સુધી હોવું જોઈએ, જ્યારે એસી 3-ટાયર અને ચેર કાર માટે 55 સેમી × 45 સેમી × 22.5 સેમીનું નાનું કદ નિર્ધારિત કરવામાં આવ્યું છે. રેલ્વેના આ નિર્ણયથી ડિજિટલ મુસાફરી વધુ સરળ અને આરામદાયક બનશે.