રાજકોટ: તા.૨૦ યુરોપના વિકસિત દેશ બેલ્જિયમમાં નોકરી કરવા ઈચ્છતા ભારતીય પ્રોફેશનલ્સ અને એમ્પ્લોયરો માટે મહત્વના સમાચાર સામે આવ્યા છે. બેલ્જિયમ સરકાર તેની ઇમિગ્રેશન સિસ્ટમમાં મોટો સુધારો કરવા જઈ રહી છે. આગામી ૧લી મે ૨૦૨૬થી, ચોક્કસ પ્રકારની વર્ક પરમિટ માટેની અરજી પ્રક્રિયા સંપૂર્ણપણે ઓનલાઇન કરી દેવામાં આવી છે. હવે જૂની ઇમેઇલ પદ્ધતિને રામ-રામ કરી દેવામાં આવશે.
કઈ પરમિટ પર લાગુ થશે નવો નિયમ?
આ નવો ફેરફાર મુખ્યત્વે ‘શોર્ટ-વર્ક પરમિટ’ (ટૂંકા ગાળાના કામ માટેની પરમિટ) અને ‘કોમ્યુટર પરમિટ’ પર લાગુ થશે. અત્યાર સુધી અરજદારો કે કંપનીઓ પીડીએફ દસ્તાવેજો બનાવીને ઇમેઇલ દ્વારા અધિકારીઓને મોકલતા હતા, પરંતુ ૧ મેથી આ પદ્ધતિ ભૂતકાળ બની જશે. જો કોઈ ભૂલથી પણ ઇમેઇલ દ્વારા અરજી કરશે, તો તે સીધી રદ ગણાશે.
ડિજિટલ પોર્ટલ ‘વર્કિંગ ઇન બેલ્જિયમ’
હવેથી તમામ અરજીઓ ફેડરલ સરકારના અધિકૃત પોર્ટલ "Working in Belgium" દ્વારા જ સબમિટ કરવાની રહેશે. આ ડિજિટલ ક્રાંતિ પાછળનો મુખ્ય હેતુ પ્રક્રિયાને સુવ્યવસ્થિત કરવાનો અને માનવીય ભૂલો ઘટાડવાનો છે. ઘણીવાર ઇમેઇલ ખોવાઈ જવાના કે સમયસર અપડેટ ન મળવાના કિસ્સા બનતા હતા, જેનો હવે અંત આવશે. ડિજિટલ સિસ્ટમથી અધિકારીઓ ઝડપથી નિર્ણય લઈ શકશે અને ફાઇલિંગની સમયરેખા પારદર્શક બનશે.
એમ્પ્લોયરોએ શું કરવું પડશે?
બેલ્જિયમની કંપનીઓ અને તેમના પ્રતિનિધિઓએ આ પોર્ટલનો ઉપયોગ કરવા માટે માન્ય ‘ડિજિટલ એક્સેસ ઓળખપત્રો’ (Credentials) મેળવવાના રહેશે. નિષ્ણાતો સલાહ આપી રહ્યા છે કે ૧ મે પહેલા જ જરૂરી આદેશો અને સેટઅપ પૂર્ણ કરી લેવા જોઈએ, જેથી છેલ્લી ઘડીએ કોઈ ટેકનિકલ અવરોધ ન આવે.
ભારતીયો માટે શું બદલાશે?
બેલ્જિયમમાં આઈટી (IT) અને એન્જિનિયરિંગ ક્ષેત્રે ઘણા ભારતીયો કાર્યરત છે. પ્રક્રિયા ડિજિટલ થવાથી અરજીમાં થતો વિલંબ ઘટશે. ઇમિગ્રેશન સેવાઓના વ્યાપક ડિજિટલ પરિવર્તનના ભાગરૂપે આ પગલું લેવામાં આવ્યું છે, જે દર્શાવે છે કે બેલ્જિયમ હવે વિદેશી કુશળ કામદારોને આવકારવા માટે વધુ આધુનિક અને ઝડપી ટેકનોલોજી અપનાવી રહ્યું છે.