વોશિંગ્ટન, તા.૧૯: યુનાઇટેડ સ્ટેટ્સ (અમેરિકા) ના રિપબ્લિકન કાયદા નિર્માતાઓ દ્વારા H-1B વિઝા કાર્યક્રમ હેઠળ મુખ્ય પગાર મર્યાદા વાર્ષિક અંદાજે $1,40,000 (આશરે ૧.૧૬ કરોડ રૂપિયા) સુધી વધારવા માટે એક મહત્વપૂર્ણ વિધેયક (બિલ) રજૂ કરવામાં આવ્યું છે. "પ્રોટેક્ટિંગ અમેરિકન વર્કર્સ થ્રુ H-1B મોર્ડનાઇઝેશન એક્ટ" નામના આ પ્રસ્તાવિત કાયદાથી યુએસ કંપનીઓ દ્વારા ભારત સહિતના કુશળ વિદેશી આઈટી અને ટેક વ્યાવસાયિકોની ભરતી કરવાની પ્રક્રિયા અને નિયમો પર મોટી અસર પડી શકે છે.

વિસ્કોન્સિનના પ્રતિનિધિ ગ્લેન ગ્રોથમેન અને ઓહિયોના સેનેટર જોન હસ્ટેડ દ્વારા સંયુક્ત રીતે રજૂ કરાયેલું આ બિલ વર્ષ ૧૯૯૮ થી યથાવત રહેલી જૂની મર્યાદામાં સુધારાનો પ્રસ્તાવ મૂકે છે. કાયદા ઘડનારાઓનું માનવું છે કે હાલની જૂની રકમ વર્તમાન વેતન ધોરણોને પ્રતિબિંબિત કરતી નથી. જોકે, સ્પષ્ટતા કરવામાં આવી છે કે $1,40,000 નો આંકડો એ તમામ H-1B વિઝા ધારકો માટેનો લઘુત્તમ ફરજિયાત પગાર નથી, પરંતુ તે ખાસ કરીને H-1B કર્મચારીઓ પર નિર્ભર કંપનીઓ માટે ભરતી સુરક્ષા નિયમોમાંથી મળતી ખાસ મુક્તિ (એક્ઝેમ્પ્શન) સાથે સંબંધિત છે.

વર્તમાન યુએસ કાયદા હેઠળ, H-1B આશ્રિત (H-1B Dependent) તરીકે વર્ગીકૃત કરાયેલા નોકરીદાતાઓએ અમેરિકન નાગરિકોના રોજગારનું રક્ષણ કરવા માટે વધારાના કડક નિયમોનું પાલન કરવું પડે છે. હાલના નિયમો અનુસાર, જો વિદેશી કર્મચારી વાર્ષિક ઓછામાં ઓછા $60,000 કમાતો હોય અથવા માસ્ટર ડિગ્રી ધરાવતો હોય, તો કંપનીઓને આ વધારાના નિયમોમાંથી મુક્તિ મળે છે. નવા પ્રસ્તાવ મુજબ, આ નિશ્ચિત $60,000 ની જૂની મર્યાદા નાબૂદ કરીને તેને નેશનલ એવરેજ વેજ ઈન્ડેક્સના બમણા એટલે કે અંદાજે $1,40,000 સાથે જોડવાની જોગવાઈ કરાઈ છે.

આ ફેરફાર પ્રસ્તાવિત કરવા પાછળનો મુખ્ય હેતુ અમેરિકન કામદારોના હિતોનું રક્ષણ કરવાનો અને કંપનીઓ દ્વારા વિદેશી કર્મચારીઓના શોષણ કે જૂના નિયમોના દુરુપયોગને અટકાવવાનો છે. કાયદા ઘડનારાઓએ દલીલ કરી છે કે આજના વેતન દરની સરખામણીમાં $60,000 નો દર ખૂબ જૂનો થઈ ગયો છે, જેના કારણે કંપનીઓ અમેરિકન કામદારોની ભરતીની ફરજિયાત શરતોમાંથી સહેલાઈથી બચી જતી હતી. આ નવા સુધારાથી ટેકનોલોજી ક્ષેત્રની કંપનીઓએ હવે વધુ પારદર્શક અને કડક પાલન કરવું પડશે.

આ કાયદાકીય પ્રસ્તાવ હાલમાં કાયદો બન્યો નથી અને પ્રારંભિક કાયદાકીય પ્રક્રિયાના તબક્કામાં છે. સત્તાવાર રેકોર્ડ મુજબ, સેનેટ સંસ્કરણ S. 5638 ને બે વાર વાંચવામાં આવ્યું છે અને ૧૪ ઓક્ટોબરના રોજ વધુ સમીક્ષા માટે સેનેટ જુડિશિયરી કમિટીને મોકલવામાં આવ્યું છે. આ બિલ યુએસ કોંગ્રેસના બંને ગૃહોમાં પસાર થયા બાદ અને અમેરિકી રાષ્ટ્રપતિની આખરી મંજૂરી મળ્યા પછી જ કાયદાનું સ્વરૂપ ધારણ કરશે. ત્યાં સુધી હાલના જૂના નિયમો જ અમલમાં રહેશે.

ભારતીય આઈટી વ્યાવસાયિકો માટે આ પ્રસ્તાવ ખૂબ મહત્વ ધરાવે છે, કારણ કે યુએસમાં H-1B વિઝા મેળવનારાઓમાં સૌથી મોટો હિસ્સો ભારતીયોનો છે. જો આ બિલ કાયદો બનશે તો સુધારેલી વેતન મર્યાદાથી ઓછો પગાર ધરાવતા કર્મચારીઓ માટે મુક્તિ મેળવવી મુશ્કેલ બનશે અને સ્પોન્સરશિપ આપતી કંપનીઓ પર વધારાની કાનૂની જવાબદારીઓ આવશે. જોકે, નિષ્ણાતોના મતે હાલમાં અમેરિકામાં કામ કરી રહેલા અથવા નોકરીની રાહ જોતા ભારતીય પ્રોફેસન્લ્સે ગભરાવાની જરૂર નથી, કારણ કે આ પ્રસ્તાવ માત્ર ચોક્કસ કેટેગરીના નિયમો પૂરતો જ મર્યાદિત છે.