નવી દિલ્હી : મધ્યમ વર્ગના રોકાણકારો અને ફિક્સ્ડ આવક પર નિર્ભર નાગરિકો માટે કેન્દ્ર સરકાર તરફથી એક મહત્વપૂર્ણ આર્થિક અપડેટ સામે આવ્યું છે. નાણા મંત્રાલયે મંગળવારે ૧ જુલાઈ, ૨૦૨૬ થી શરૂ થતા ચાલુ નાણાકીય વર્ષ (૨૦૨૬-૨૭) ના બીજા ક્વાર્ટર માટે પબ્લિક પ્રોવિડન્ટ ફંડ (PPF) અને નેશનલ સેવિંગ્સ સર્ટિફિકેટ (NSC) સહિતની તમામ લોકપ્રિય નાની બચત યોજનાઓના વ્યાજ દરોમાં કોઈ જ ફેરફાર ન કરવાનો નિર્ણય લીધો છે. આ સાથે આ યોજનાઓ પરના વ્યાજ દરો સતત નવમા ક્વાર્ટરમાં પણ સ્થિર અને યથાવત રહ્યા છે.

નાણા મંત્રાલયનું સત્તાવાર જાહેરનામું

નાણા મંત્રાલય દ્વારા જારી કરાયેલી સત્તાવાર સૂચના અનુસાર,

"નાણાકીય વર્ષ ૨૦૨૬-૨૭ ના બીજા ક્વાર્ટર માટે, જે ૧ જુલાઈ, ૨૦૨૬ થી શરૂ થઈને ૩૦ સપ્ટેમ્બર, ૨૦૨૬ ના રોજ પૂરું થાય છે, વિવિધ નાની બચત યોજનાઓ પરના વ્યાજ દરો, પ્રથમ ક્વાર્ટર (૧ માર્ચ, ૨૦૨૬ થી ૩૦ જૂન, ૨૦૨૬) માટે નક્કી કરાયેલા વ્યાજ દરો જેટલા જ જાળવી રાખવામાં આવશે."

કઈ યોજના પર કેટલું વ્યાજ મળશે? (એક નજરે):

મુખ્યત્વે પોસ્ટ ઓફિસ અને રાષ્ટ્રીયકૃત બેંકો દ્વારા સંચાલિત આ યોજનાઓમાં ૧ જુલાઈથી નીચે મુજબ વ્યાજ ચૂકવવામાં આવશે:

·         સુકન્યા સમૃદ્ધિ યોજના: દીકરીઓના ઉજ્જવળ ભવિષ્ય માટેની આ ખૂબ જ લોકપ્રિય યોજનામાં રોકાણકારોને સૌથી વધુ ૮.૨ ટકા વ્યાજ મળતું રહેશે.

·         નેશનલ સેવિંગ્સ સર્ટિફિકેટ (NSC): આ ટેક્સ-સેવિંગ પ્રમાણપત્ર પર વ્યાજ દર ૭.૭ ટકા પર અકબંધ રાખવામાં આવ્યો છે.

·         કિસાન વિકાસ પત્ર (KVP): ખેડૂતો અને ગ્રામીણ રોકાણકારો માટેની આ યોજનામાં ૭.૫ ટકા વ્યાજ મળશે, જ્યાં રોકાણ કરાયેલી રકમ ૧૧૫ મહિનામાં પરિપક્વ (ડબલ) થશે.

·         માસિક આવક યોજના (MIS): નિયમિત માસિક કમાણી ઈચ્છતા વરિષ્ઠ નાગરિકો માટે આ યોજનામાં ૭.૪ ટકા નું વળતર ચાલુ રહેશે.

·         પબ્લિક પ્રોવિડન્ટ ફંડ (PPF) & સેવિંગ્સ એકાઉન્ટ: લોંગ-ટર્મ સેવિંગ્સ માટેના PPF પર ૭.૧ ટકા અને સામાન્ય પોસ્ટ ઓફિસ સેવિંગ્સ ડિપોઝિટ પર ૪ ટકા વ્યાજ દર સ્થિર રાખવામાં આવ્યો છે. જ્યારે ૩ વર્ષની મુદતની ફિક્સ્ડ ડિપોઝિટ (TD) પર ૭.૧ ટકા વ્યાજ મળશે.

વર્ષ ૨૦૨૩ પછી વ્યાજ દરોમાં કોઈ ફેરફાર નહીં

રોકાણકારો માટે રાહતની વાત એ છે કે વૈશ્વિક સ્તરે અને સ્થાનિક બજારોમાં થતી આર્થિક ઉથલપાથલ વચ્ચે પણ સરકારે વ્યાજ દરો ઘટાડ્યા નથી. ઉલ્લેખનીય છે કે, સરકારે છેલ્લે નાણાકીય વર્ષ ૨૦૨૩-૨૪ ના ચોથા ક્વાર્ટરમાં કેટલીક પસંદગીની બચત યોજનાઓના વ્યાજ દરોમાં સુધારો કર્યો હતો, ત્યારબાદથી આ વ્યાજ દરો એક સમાન સ્તરે જાળવી રાખવામાં આવ્યા છે, જે સુરક્ષિત રોકાણ ઈચ્છતા રોકાણકારો માટે ખૂબ જ સાનુકૂળ બાબત છે.