નવી દિલ્હી : લાખો કેન્દ્રીય કર્મચારીઓ અને પેન્શનરો માટે ૮મા પગાર પંચને લઈને અત્યંત ઉત્સાહજનક અપડેટ સામે આવ્યા છે. સરકારે આઠમા પગાર પંચની ભલામણો પર ઝડપથી કામગીરી શરૂ કરી દીધી છે. વર્ષ ૨૦૨૬ ના પ્રથમ ભાગમાં પગાર પંચનું પોર્ટલ લોન્ચ થઈ ચૂક્યું છે અને વિવિધ કર્મચારી સંગઠનો સાથે પરામર્શ બેઠકોનો દોર પણ ધમધમી રહ્યો છે, જેનાથી કર્મચારીઓમાં નવા પગાર અને ભથ્થાં અંગે ભારે ઉત્સુકતા જોવા મળી રહી છે.

કેન્દ્ર સરકારના કર્મચારીઓના પ્રતિનિધિ સંગઠન NC-JCM દ્વારા ૮મા પગાર પંચ સમક્ષ ૩.૮૩૩ ના ફિટમેન્ટ ફેક્ટરની મજબૂત માંગણી કરવામાં આવી છે. જોકે, આર્થિક નિષ્ણાતોનું માનવું છે કે જો પગાર પંચ ફિટમેન્ટ ફેક્ટર ૨.૦ થી ૨.૨૫ ની વચ્ચે પણ નક્કી કરે છે, તો પણ લેવલ ૧ થી ૧૮ ના કર્મચારીઓના કુલ પગારમાં ૩૧% થી લઈને ૬૮% સુધીનો મજબૂત વધારો જોવા મળી શકે છે.

ફિટમેન્ટ ફેક્ટર અને કુલ પગારનું રસપ્રદ ગણિત

ઘણા કર્મચારીઓને પ્રશ્ન છે કે શું ફિટમેન્ટ ફેક્ટર વધવાથી સીધો જ એ જ પ્રમાણમાં પગાર વધે છે? ભૂતકાળના આંકડા દર્શાવે છે કે ૬ઠ્ઠા પગાર પંચમાં ૧.૮૬ ફિટમેન્ટ ફેક્ટર હોવા છતાં કુલ પગારમાં પ૪% નો મોટો ઉછાળો આવ્યો હતો, જ્યારે ૭મા પગાર પંચમાં ૨.૫૭ ફિટમેન્ટ ફેક્ટર છતાં કુલ વેતનમાં ૧૪.૨૯% નો વધારો થયો હતો.

આ તફાવત પાછળ મૂળભૂત પગાર (Basic Pay) ઉપરાંત મોંઘવારી ભથ્થું (DA), ઘરભાડું ભથ્થું (HRA) અને ટ્રાન્સપોર્ટ એલાઉન્સ (TPTA) જેવા મુખ્ય ઘટકો મહત્વની ભૂમિકા ભજવે છે. હવે તમામની નજર આગામી સમયમાં આઠમા પગાર પંચ દ્વારા સરકારને સોંપવામાં આવનારી આખરી ભલામણો પર ટકેલી છે.