મુંબઈ : દેશની સૌથી મોટી ખાનગી ક્ષેત્રની ધિરાણકર્તા HDFC બેંકમાં ટૂંક સમયમાં મોટો નેતૃત્વ ફેરફાર જોવા મળશે. બેંકના વર્તમાન MD અને CEO શશીધર જગદીશન દ્વારા પુનઃનિયુક્તિ ન સ્વીકારવાના નિર્ણય બાદ, બેંકના બોર્ડ ઓફ ડિરેક્ટર્સે નવી પસંદગી પ્રક્રિયા પૂર્ણ કરીને ત્રણ વર્ષના કાર્યકાળ માટે બે ઉમેદવારોના નામો પસંદગીના ક્રમમાં ભારતીય રિઝર્વ બેંક (RBI)ને મંજૂરી અર્થે મોકલી આપ્યા છે. ૧૨ સપ્ટેમ્બરના રોજ યોજાયેલી બોર્ડ બેઠકમાં આ મહત્વપૂર્ણ પ્રસ્તાવને આખરી ઓપ આપવામાં આવ્યો હતો.

આરબીઆઈને સબમિટ કરાયેલી દરખાસ્તમાં ઉમેદવારોના પ્રસ્તાવિત પગાર ધોરણ અને અન્ય સેવા શરતોની વિગતો પણ સામેલ કરવામાં આવી છે. આ સિવાય બેંકના વરિષ્ઠ નેતૃત્વ અને બોર્ડના માળખામાં કેટલાક અન્ય મહત્વપૂર્ણ ફેરફારોની પણ શિફારશ કરવામાં આવી છે.

બોર્ડે વર્ષ ૧૯૯૪થી બેંક સાથે જોડાયેલા અને વર્તમાન ચીફ ક્રેડિટ ઓફિસર જિમી ટાટાને ત્રણ વર્ષ માટે પૂર્ણ-સમયના ડિરેક્ટર (એક્ઝિક્યુટિવ ડિરેક્ટર) તરીકે નિયુક્ત કરવાનો પ્રસ્તાવ મૂક્યો છે. આ ઉપરાંત, વી. શ્રીનિવાસ રંગનની પૂર્ણ-સમયના ડિરેક્ટર તરીકે ૨૩ નવેમ્બર, ૨૦૨૬થી ૨૨ નવેમ્બર, ૨૦૨૭ સુધીના સમયગાળા માટે પુનઃનિયુક્તિની ભલામણ કરાઈ છે.

બેંકની સતત વધી રહેલી કામગીરી અને પેટાકંપનીઓના યોગ્ય સંકલનને ધ્યાનમાં રાખીને બોર્ડે વધુ એક પૂર્ણ-સમયના ડિરેક્ટર (FTO)નું નવું પદ ઊભું કરવાની પણ મંજૂરી આપી છે. આ નવા પદની રચના બાદ બેંકમાં MD અને CEO સિવાય કુલ ૪ પૂર્ણ-સમયના ડિરેક્ટરો રહેશે, જેનાથી ભવિષ્યના નેતૃત્વ (ઉત્તરાધિકાર આયોજન) માટે મજબૂત પાયો તૈયાર કરી શકાશે. આ તમામ પ્રસ્તાવિત નિયુક્તિઓ હવે રિઝર્વ બેંક ઓફ ઈન્ડિયાની આખરી મંજૂરી પર આધારિત રહેશે.