નવી દિલ્હી:  તહેવારોની આગામી મોસમ સાથે જ ઘરોમાં મીઠાઈઓ અને વાનગીઓની સુગંધ પ્રસરવા લાગી છે, ત્યારે રસોઈ ગેસ (LPG) ગ્રાહકો માટે એક અત્યંત રાહતજનક અને રસપ્રદ સમાચાર સામે આવ્યા છે. મધ્ય પૂર્વના દેશોમાં ચાલી રહેલી રાજકીય કટોકટી અને ગેસ પુરવઠાના વધતા ઘર્ષણ વચ્ચે પણ સામાન્ય માનવીના ખિસ્સા પરનો બોજ હળવો કરવા માટે સરકારે અને દેશની સૌથી મોટી ઓઇલ કંપની ઇન્ડિયન ઓઇલ કોર્પોરેશન લિમિટેડ  એ એક ક્રાંતિકારી યોજનાને વેગ આપ્યો છે. આ યોજનાનું મુખ્ય આકર્ષણ છે ખાસ તૈયાર કરાયેલો "છોટુ" સિલિન્ડર, જે પોતાના નામ પ્રમાણે જ ખૂબ નાના પેકિંગમાં મોટી સુવિધા લઈને આવ્યો છે. માત્ર 5 કિલોગ્રામ ગેસની ક્ષમતા ધરાવતો આ સિલિન્ડર હવે એવા લોકો માટે વરદાન સાબિત થઈ રહ્યો છે જેમને મોટો સિલિન્ડર ખરીદવો પોસાય તેમ નથી અથવા જેમના ઘરમાં જગ્યાની મર્યાદા છે.

આ સમાચારમાં સૌથી વધુ રસપ્રદ વાત ₹500 ની બચત અને કેશબેક ગેરંટીની છે! સામાન્ય રીતે મોટો ગેસ સિલિન્ડર લેવા માટે હજારો રૂપિયાની સિક્યોરિટી ડિપોઝિટ ભરવી પડતી હોય છે અને કાગળિયાની લાંબી પ્રક્રિયામાંથી પસાર થવું પડે છે. પરંતુ 'છોટુ' સિલિન્ડર ખરીદવા માટે કોઈ ભારે સિક્યોરિટી ડિપોઝિટની જરૂર રહેતી નથી. સૌથી મોટો ધમાકો એ છે કે, જો ગ્રાહક આ સિલિન્ડરનો ઉપયોગ કર્યા પછી તેને ગમે ત્યારે પરત કરવા માંગે—પછી ભલે તેણે તે સિલિન્ડર ૧૦ દિવસ વાપર્યો હોય કે થોડા મહિના—તો તેને કોઈપણ ઝંઝટ વગર ₹500 નું ફ્લેટ રિફંડ (રોકડ પરત) આપી દેવામાં આવશે. આ સુવિધા ખાસ કરીને કામ અર્થે એક શહેરથી બીજા શહેરમાં આવતા સ્થળાંતરિત મજૂરો, બેચલર વિદ્યાર્થીઓ અને ના નાના વેપારીઓ માટે આર્થિક રીતે ખૂબ જ ફાયદાકારક સાબિત થઈ રહી છે.

ઇન્ડિયન ઓઇલે ગ્રાહકોની સુવિધા માટે આ સિલિન્ડરનું વિતરણ પણ અત્યંત સરળ બનાવી દીધું છે. હવે તમારે ગેસ એજન્સીઓના ચક્કર કાપવાની બિલકુલ જરૂર નથી; તમારા નજીકના ઇન્ડેન ડિસ્ટ્રિબ્યુટર ઉપરાંત સ્થાનિક કરિયાણાની દુકાનો, સુપરમાર્કેટ્સ અને નજીકના પેટ્રોલ પંપ (ઇન્ડિયન ઓઇલ આઉટલેટ્સ) પરથી પણ આ સિલિન્ડર સહેલાઈથી મળી રહેશે. આ સિવાય, માત્ર ₹25 નો મામૂલી હોમ ડિલિવરી ચાર્જ ચૂકવીને તમે આ સિલિન્ડર સીધો તમારા ઘરે પણ મગાવી શકો છો. સપ્ટેમ્બરમાં PNG નેટવર્કનો વ્યાપ વધવાને કારણે LPG ની માંગમાં 9.15% નો ઘટાડો નોંધાયો હતો, પરંતુ ઓક્ટોબરના તહેવારોની મોસમમાં આ 'છોટુ' સિલિન્ડરની માંગમાં અચાનક મોટો ઉછાળો જોવા મળી રહ્યો છે.