નવી દિલ્હી : તહેવારોની મોસમ નજીક આવવાની સાથે સામાન્ય રીતે સોનાની માંગમાં ભારે વધારો થતો હોય છે, પરંતુ આ વખતે દશેરા અને દિવાળી પહેલા બજારમાં બિલકુલ ઉલટું વલણ જોવા મળ્યું છે. આ અઠવાડિયે સોનાના ભાવમાં નોંધપાત્ર કડાકો બોલાયો છે, જેમાં 24 કેરેટ સોનું પ્રતિ 10 ગ્રામ રૂ.3,500 અને 22 કેરેટ દાગીનાનું સોનું રૂ.3,200 સસ્તું થયું છે, જે તહેવારોની ખરીદી કરનારાઓ માટે કોઈ વરદાનથી ઓછું નથી. સોનાની સાથેસાથે ચાંદીના ભાવ પણ તૂટ્યા છે અને 1લી ઓક્ટોબરે માત્ર ઔદ્યોગિક માંગ ઘટવાને કારણે એક કિલો ચાંદીના ભાવમાં સીધો રૂ.5,000 નો મોટો ઘટાડો નોંધાયો છે.
ઉત્સવ ટાણે માંગ હોવા છતાં સ્થાનિક અને આંતરરાષ્ટ્રીય બુલિયન બજારોમાં કિંમતી ધાતુઓ ભારે દબાણ હેઠળ છે, જેની પાછળનું સૌથી મોટું કારણ યુએસ ફેડરલ રિઝર્વની આગામી નાણાકીય નીતિ બેઠક છે. આગામી 28 ઓક્ટોબરે યોજાનારી ફેડની બેઠક પર બજારની નજર છે, કારણ કે વ્યાજ દરોને લગતી અનિશ્ચિતતાને કારણે મોટા સંસ્થાકીય રોકાણકારોએ સાવચેતી રાખીને સોનામાં ભારે નફો બુકિંગ કરવાનું શરૂ કર્યું છે.
આજના બજાર ભાવની વાત કરીએ તો દિલ્હી, લખનૌ અને જયપુરમાં 24 કેરેટ સોનું રૂ.1,49,330, જ્યારે મુંબઈ, કોલકાતા અને બેંગલુરુમાં રૂ.1,49,180 પ્રતિ 10 ગ્રામના ભાવે વેચાઈ રહ્યું છે. આ ઉપરાંત પટના અને અમદાવાદમાં પણ 24 કેરેટ સોનાનો ભાવ રૂ.1,49,230 અને 22 કેરેટ સોનાનો ભાવ રૂ.1,36,800 આસપાસ ચાલી રહ્યો છે, જે વિવિધ શહેરોમાં ગ્રાહકોને થોડી રાહત આપી રહ્યો છે.
અગાઉ ફેડ ચેરમેન દ્વારા વ્યાજ દરો વધવાની 70% સંભાવના મનાતી હતી, પરંતુ યુએસના તાજેતરના ફુગાવાના આંકડા અપેક્ષા કરતા ઓછા આવતા હવે આ સંભાવના ઘટીને માત્ર 22% રહી ગઈ છે. વિશ્લેષકો માને છે કે જો યુએસ ફેડરલ રિઝર્વ વ્યાજ દરો વર્તમાન સ્તરે સ્થિર રાખશે, તો સોનાના ભાવ પરનું આ દબાણ આગામી સમયમાં હળવું થઈ શકે છે.