રાજકોટ, તા. 04 જૂન, 2026 તમિલનાડુના રાજકીય આકાશમાં એક મોટું પરિવર્તન આવી રહ્યું છે. ભાજપના યુવા અને આક્રમક નેતા ગણાતા કે. અન્નામલાઈએ ભારતીય જનતા પાર્ટી સાથેના તેમના સંબંધોને પૂર્ણવિરામ મૂકી દીધું છે. ભૂતપૂર્વ IPS અધિકારીએ નવી દિલ્હીમાં પાર્ટીના હાઈકમાન્ડને પોતાનું પાંચ પાનાનું લાંબું રાજીનામું સુપરત કરીને રાજકીય વર્તુળોમાં ખળભળાટ મચાવી દીધો છે. આવતીકાલે, 5 જૂને તેઓ ચેન્નાઈમાં એક મોટી પ્રેસ કોન્ફરન્સ યોજીને તેમના ભવિષ્યના રાજકીય પગલાં વિશે જાહેરાત કરે તેવી પ્રબળ શક્યતા છે.
દિલ્હીની બંધ બારણે બેઠક અને ગરમાતી ચર્ચાઓ
રાજીનામાની સત્તાવાર પુષ્ટિ પહેલા, અન્નામલાઈએ દિલ્હીમાં કેન્દ્રીય ગૃહમંત્રી અમિતભાઈ શાહ સાથે મુલાકાત કરી હતી. સૂત્રોના જણાવ્યા અનુસાર, આ બેઠકમાં તેમણે પાર્ટી છોડવા પાછળના તેમના કારણો સ્પષ્ટ કર્યા હતા. જોકે, ભાજપ નેતૃત્વ તરફથી તેમને મનાવવાની કે મુદ્દાઓ પર ફરી વિચાર કરવાની તક આપવામાં આવી હોવાની પણ વાતો વહેતી થઈ છે, પરંતુ અન્નામલાઈનું મન હવે બદલાઈ ગયું હોય તેમ લાગી રહ્યું છે.
IPS થી નેતા સુધીની સફર: એક વિવાદાસ્પદ પણ યાદગાર ઈનિંગ
વર્ષ 2020 માં 40 વર્ષની નાની વયે ખાખી વર્દી ઉતારીને રાજકારણના મેદાનમાં ઉતરેલા અન્નામલાઈએ ખૂબ જ ટૂંકા ગાળામાં તમિલનાડુ ભાજપને નવી ઓળખ આપી હતી. દ્રવિડ પક્ષોના ગઢ ગણાતા આ રાજ્યમાં તેમણે ભાજપને એક આક્રમક ચહેરો આપ્યો હતો. જોકે, AIADMK સાથેના ગઠબંધન તૂટવાને કારણે સર્જાયેલા તણાવ અને ત્યારબાદ બદલાયેલા રાજકીય સમીકરણોએ તેમને પદ છોડવા માટે મજબૂર કર્યા હતા. એપ્રિલ 2025 માં તેમણે રાજ્ય પ્રમુખ પદેથી રાજીનામું આપ્યા બાદ હવે પાર્ટીમાંથી સંપૂર્ણ વિદાય લઈને તેમણે તમિલનાડુના રાજકારણને એક નવા વળાંક પર લાવી દીધું છે.
આવતીકાલનો દિવસ રહેશે નિર્ણાયક

હવે સમગ્ર તમિલનાડુ અને રાજકીય વિશ્લેષકોની નજર 5 જૂનના દિવસ પર ટકેલી છે. શું અન્નામલાઈ કોઈ નવી પાર્ટી બનાવશે? કે પછી તેઓ કોઈ અન્ય પક્ષમાં જોડાઈને નવી ઈનિંગ શરૂ કરશે? આ તમામ સવાલોના જવાબ આવતીકાલે ચેન્નાઈમાં મળવાની અપેક્ષા છે. અન્નામલાઈનો આ નિર્ણય માત્ર ભાજપ માટે જ નહીં, પરંતુ સમગ્ર રાજ્યના ગઠબંધન સમીકરણો માટે મોટો ફેરફાર સાબિત થઈ શકે છે.