ચંડીગઢ, તા.૨૨: આમ આદમી પાર્ટી (AAP) નો સાથ છોડીને ભારતીય જનતા પાર્ટી (BJP) નો ભગવો ધારણ કરનારા પૂર્વ દિગ્ગજ ક્રિકેટર અને રાજ્યસભા સાંસદ હરભજન સિંહે પંજાબના રાજકારણમાં એક નવો જ ગરમાવો લાવી દીધો છે. પોતાના પક્ષપલટા અંગે સોશિયલ મીડિયા પર થઈ રહેલી તીખા પ્રહારો અને ટીકાઓ સામે લાલઘૂમ થયેલા હરભજન સિંહે પંજાબમાં રાજ્યસભા બેઠકોની ફાળવણી અને કેબિનેટ મંત્રી પદની વહેંચણીમાં મોટા પાયે ભ્રષ્ટાચાર અને ગેરરીતિઓ થઈ હોવાના ગંભીર આક્ષેપો કર્યા છે. તેમના આ નિવેદનથી સમગ્ર વિપક્ષી છાવણીમાં ભૂકંપ આવી ગયો છે.
'ગદ્દાર' અને '૨૫ કરોડ' ના આરોપ પર ભજ્જી ભડક્યા
તાજેતરમાં જ 'આપ' ના અન્ય છ રાજ્યસભા સાંસદો સાથે ભાજપમાં જોડાયેલા હરભજન સિંહને સોશિયલ મીડિયા પર ભારે ટ્રોલિંગનો સામનો કરવો પડી રહ્યો છે. સોશિયલ મીડિયા પ્લેટફોર્મ X (અગાઉનું ટ્વિટર) પર દેવેન્દ્ર યાદવ નામના એક યુઝરે હરભજન સિંહને "ગદ્દાર" (દેશદ્રોહી) કહીને નવાજ્યા હતા. આ યુઝરે સવાલ ઉઠાવ્યો હતો કે પક્ષ બદલતા પહેલા હરભજને 'આપ' દ્વારા અપાયેલી સીટ પરથી રાજીનામું કેમ ન આપ્યું? એટલું જ નહીં, આ પોસ્ટમાં એવો પણ ગંભીર આરોપ લગાવાયો હતો કે ભાજપે પક્ષપલટો કરનારા સાંસદોને ૨૫-૨૫ કરોડ રૂપિયાની ઓફર આપીને ખરીદ્યા છે.
'યોગ્ય સમયે બધાના નામ જાહેર કરીશ'
આ આક્ષેપોનો સણસણતો જવાબ આપતા ટર્બનેટર હરભજન સિંહે પંજાબના સત્તાધારી નેતાઓ પર આકરા પ્રહારો કર્યા. તેમણે દાવો કર્યો કે તેઓ પંજાબમાં રાજ્યસભાની બેઠકો અને મંત્રી પદોની નિમણૂક પાછળ થયેલા કથિત અંડર-ટેબલ સોદાઓનો "યોગ્ય સમયે" પર્દાફાશ કરશે. હરભજને ખુલ્લેઆમ આક્ષેપ કર્યો છે કે આ બેઠકો કરોડો રૂપિયામાં "વેચાઈ" હતી. તેમણે ચીમકી આપી છે કે આ સોદાબાજીથી કોને લાભ મળ્યો, કોણે પૈસા લીધા અને કોના વતી આખી ડીલ થઈ, તેની તમામ વિગતો તેમની પાસે છે અને તેઓ તે ટૂંક સમયમાં જાહેર કરશે.
પંજાબને લૂંટનારાઓનો ચહેરો ખુલ્લો પાડીશ
ભૂતપૂર્વ ક્રિકેટરમાંથી નેતા બનેલા હરભજન સિંહે વધુમાં ઉમેર્યું કે કેટલાક નેતાઓએ પોતાના અંગત સ્વાર્થ અને ફાયદા માટે થઈને આખાય "પંજાબને લૂંટી ખાધું છે" અને મનસ્વી રીતે મંત્રી પદો વહેંચ્યા છે. ઓનલાઈન પ્લેટફોર્મ પર સતત નિશાન બનાવવામાં આવી રહ્યા હોવા છતાં, તેમણે પોતાનો બચાવ કરતા કહ્યું કે તેમણે અત્યાર સુધી કોઈ પણ નેતા માટે અપશબ્દોનો ઉપયોગ કર્યો નથી કે કોઈનું વ્યક્તિગત અપમાન કર્યું નથી, પરંતુ તેઓ સત્ય સામે લાવવાથી પાછા નહીં હટે. ભાજપમાં જોડાતા પહેલા રાજ્યસભામાં પોતાને "વાસ્તવિક" જૂથ ગણાવનારા હરભજન અને અન્ય છ સાંસદો સામે હાલ આપના સમર્થકોનો ગુસ્સો સાતમા આસમાને છે, ત્યારે ભજ્જીના આ લેટેસ્ટ પલટવારે પંજાબના રાજકારણમાં ભારે સસ્પેન્સ વધારી દીધું છે.