પટના : બિહારની સૌથી હાઈ-પ્રોફાઈલ ગણાતી બાંકીપુર વિધાનસભા બેઠકની પેટાચૂંટણી પહેલાં જ એક અત્યંત ચોંકાવનારો અને નાટકીય વળાંક સામે આવ્યો છે. ભાજપ દ્વારા સત્તાવાર ઉમેદવાર જાહેર કરાયેલા અને પક્ષના પીઢ કાર્યકર એવા અભિષેક સિંહા (જેઓ રાજકીય વર્તુળોમાં અભિષેક બંટી તરીકે જાણીતા છે) તેમણે શુક્રવારે સાંજે અચાનક જ પોતાનું ઉમેદવારીપત્ર પાછું ખેંચી લીધું છે. આ જાહેરાત થતાંની સાથે જ બિહારના રાજકીય ગલિયારાઓમાં અટકળોનો દોર શરૂ થઈ ગયો છે અને ભાજપ છાવણીમાં દોડધામ મચી ગઈ છે.

૨૪ કલાકમાં જ મોટો રાજકીય ઉલટફેર

રસપ્રદ વાત એ છે કે, હજુ ગુરુવારે જ અભિષેક બંટીએ બિહારના મુખ્યમંત્રી સમ્રાટ ચૌધરી સહિતના દિગ્ગજ નેતાઓની ભવ્ય હાજરી વચ્ચે પોતાની ઉમેદવારી નોંધાવી હતી. ફોર્મ ભર્યા બાદ તેમણે રાજ્યના પૂર્વ મુખ્યમંત્રી નીતિશ કુમારના આશીર્વાદ પણ લીધા હતા. જોકે, ૨૪ કલાક જેટલા ટૂંકા ગાળામાં એવું તે શું બન્યું કે તેમણે મેદાન છોડવું પડ્યું, તે રહસ્ય હજુ અકબંધ છે. શુક્રવારે સાંજે એકાએક પ્રેસ કોન્ફરન્સ બોલાવીને તેમણે સ્પષ્ટ કર્યું કે તેઓ "કૌટુંબિક કારણોસર" ચૂંટણી નથી લડી રહ્યા અને આ અંગે ભાજપના પ્રદેશ પ્રમુખ સંજય સરાઓગીને પણ માહિતગાર કરી દીધા છે.

બૂથ પ્રમુખથી લઈને ટિકિટ મળવા સુધીની સફર

અભિષેક સિંહા ઉર્ફે બંટી છેલ્લા ૨૭ વર્ષથી ભારતીય જનતા પાર્ટીમાં પાયાના સ્તરે સક્રિય છે. તેમણે પક્ષમાં ખૂબ જ સામાન્ય ગણાતા 'બૂથ પ્રમુખ'ના પદથી પોતાની રાજકીય સફર શરૂ કરી હતી. ત્યારબાદ તેઓ મંડળ મંત્રી, મંડળ મહાસચિવ અને પટના મહાનગર યુવા મોરચાના પ્રમુખ જેવા પદો પર રહ્યા હતા. હાલમાં તેઓ બિહાર ભાજપ યુવા મોરચાના પ્રદેશ ઉપાધ્યક્ષ તરીકે સેવા આપી રહ્યા છે. ભાજપના રાષ્ટ્રીય નેતા નીતિન નવીનના અત્યંત નજીકના ગણાતા અભિષેક બંટીની સ્થાનિક સંગઠન પર મજબૂત પકડ છે, તેથી જ પક્ષે કોઈ મોટા ચહેરાને બદલે જમીની કાર્યકર પર આ મોટો દાવ ખેલ્યો હતો.

ભાજપ હવે નવા ચહેરાની શોધમાં

એક વફાદાર સંગઠન કાર્યકર્તા તરીકેની છબી ધરાવતા ઉમેદવારે છેલ્લી ઘડીએ પીછેહઠ કરતાં સ્થાનિક કાર્યકરોના મનોબળને મોટો ફટકો પડ્યો છે. ઉમેદવારીપત્ર પાછું ખેંચવાની આ આકસ્મિક ઘટના બાદ હવે બાંકીપુરની બેઠક જાળવી રાખવા માટે ભાજપ નેતૃત્વએ તાબડતોબ બેઠકોનો દોર શરૂ કર્યો છે અને નવા મજબૂત ઉમેદવારની શોધ તેજ કરી દીધી છે.