નવી દિલ્હી, તા.10: ભારતીય આકાશમાં મુસાફરી કરતા કરોડો પ્રવાસીઓની સુરક્ષાને ધ્યાનમાં રાખીને દેશના ઉડ્ડયન નિયમનકાર ડિરેક્ટોરેટ જનરલ ઓફ સિવિલ એવિએશન (DGCA) એ એક અત્યંત મહત્વપૂર્ણ અને કડક આદેશ જારી કર્યો છે. એરલાઈન્સમાં ક્રૂ સભ્યો અને નશાકારક પદાર્થોના ઉપયોગ અંગે સામે આવેલી ગંભીર ઘટનાઓ બાદ, DGCA એ તમામ એરલાઇન્સને જુલાઈ ૨૦૨૭ સુધીમાં પોતાના દરેક પાઇલટનું ફરજિયાત 'વન-ટાઇમ ડ્રગ સ્ક્રીનીંગ' પૂર્ણ કરવાની સ્પષ્ટ સૂચના આપી છે. સરકારી સૂત્રોના જણાવ્યા અનુસાર, દેશની તમામ એરલાઇન્સમાં આ પ્રક્રિયા શરૂ પણ કરી દેવામાં આવી છે.

ફૂકેટ-એર ઈન્ડિયા ફ્લાઇટ ઘટના બની નિમિત્ત

આ કડક આદેશ પાછળ ફૂકેટથી ભારત આવી રહેલી એર ઈન્ડિયાની એરબસ A320 ફ્લાઇટમાં બનેલી એક ગંભીર ઘટના જવાબદાર છે. ઉડાન દરમિયાન વિમાનની ત્રણેય હાઇડ્રોલિક સિસ્ટમમાં ખામી સર્જાતા ઓટોપાયલટ ડિસ્કનેક્ટ થઈ ગયું હતું અને વિમાને ક્ષણભરમાં ૩૦૦ ફૂટની ઊંચાઈ ગુમાવી દીધી હતી. ૪ ઓગસ્ટે ભારતમાં ઈમરજન્સી લેન્ડિંગ બાદ જ્યારે તપાસ હાથ ધરવામાં આવી, ત્યારે પ્લેનના કેપ્ટનનો ડ્રગ ટેસ્ટ પોઝિટિવ આવ્યો હતો. એરક્રાફ્ટ એક્સિડેન્ટ ઇન્વેસ્ટિગેશન બ્યુરો (AAIB) એ આ બાબતને "અત્યંત ગંભીર ચિંતા" ગણાવીને ત્વરિત પગલાં ભરવાની ભલામણ કરી હતી.

નવા કડક નિયમો ટૂંક સમયમાં થશે જાહેર

નાગરિક ઉડ્ડયન પ્રધાન કિંજરાપુ રામમોહન નાયડુએ આ અંગે માહિતી આપતા જણાવ્યું હતું કે પાઇલટો માટેના સુધારેલા ડ્રગ પરીક્ષણ નિયમોના ડ્રાફ્ટને આ મહિનાના અંત સુધીમાં આખરી ઓપ આપી દેવામાં આવશે. આ નવા માળખાથી પાઇલટ સ્ક્રીનીંગ વધુ વ્યાપક બનશે અને એરલાઇન્સ માટે નિયમોનું પાલન કરવું અનિવાર્ય બની જશે. વૈશ્વિક સ્તરે ઉડ્ડયન સુરક્ષાના ધોરણો સુધારવાના ભાગરૂપે આ પગલું ભરવામાં આવ્યું છે, જેથી કોઈ પણ પાઇલટ વિમાનનું કોકપીટ સંભાળતા પહેલા સંપૂર્ણ રીતે સ્વસ્થ અને સક્ષમ હોય તે સુનિશ્ચિત કરી શકાય.