નવી દિલ્હી, તા. ૧૧ : ભારત અને બ્રિટન વચ્ચે જુલાઈથી અમલમાં આવેલા વેપારકરાર હેઠળ આયાત થતી સ્કોચ વ્હિસ્કી ઉપરની જકાત અંગે ગંભીર વિવાદ ઊભો થયો છે. તપાસ અધિકારીઓએ જથ્થાબંધ આયાત થતી સ્કોચને તૈયાર વ્હિસ્કી નહીં પરંતુ વધુ પ્રક્રિયા માટેની સામગ્રી ગણાવી ૧૫૦ ટકા જકાત વસૂલવા સૂચના આપી છે.

કંપનીઓના મતે વેપારકરાર મુજબ ૭૫ ટકા જકાત લાગવી જોઈએ. પર્નોડ રિકાર્ડ અને ડિયાજિયોનાં ૪૦થી વધુ કન્ટેનર પ્રત્યેક કંપનીનાં અટકાવવામાં આવ્યાં છે. બકાર્ડીનાં પાંચ કન્ટેનર પણ અટવાયાં હોવાનો અહેવાલ છે.

વાણિજ્ય મંત્રાલયે અગાઉ વેપારકરારનો લાભ આપવાની ખાતરી આપી હતી, પરંતુ નાણાં મંત્રાલય હેઠળની તપાસ એજન્સીએ અલગ વલણ અપનાવ્યું છે. બંને મંત્રાલયો વચ્ચે ઉકેલ માટે ચર્ચા ચાલી રહી હોવાનું જાણવા મળે છે.