મુર્શિદાબાદ : પશ્ચિમ બંગાળના મુર્શિદાબાદમાં શનિવાર, ૯ મે ૨૦૨૬ના રોજ પોલીસે એક ગુપ્ત ઓપરેશન પાર પાડીને હથિયારો અને દારૂગોળાનો મોટો જથ્થો ઝડપી પાડ્યો છે. આ દરોડો તૃણમૂલ કોંગ્રેસ (TMC) ના એક વરિષ્ઠ નેતાના નજીકના સાથીના ઘરે પાડવામાં આવ્યો હોવાનું બહાર આવતા રાજ્યના રાજકીય વર્તુળોમાં ભારે ગરમાવો આવી ગયો છે.
૧૪૦ કારતુસ અને ૩ રિવોલ્વર જપ્ત
પોલીસના જણાવ્યા અનુસાર, સૈદાબાદ ગિરજાપાડા વિસ્તારમાં બાતમીના આધારે આ કાર્યવાહી કરવામાં આવી હતી. સર્ચ ઓપરેશન દરમિયાન પોલીસને ૧૪૦ રાઉન્ડ જીવતા કારતુસ, ૭.૬૫ એમએમની ૩ અત્યાધુનિક રિવોલ્વર અને એક મેગેઝિન મળી આવ્યું છે. આ મામલે પોલીસે ટુકુ સરકાર નામની મહિલાની ઘટનાસ્થળેથી ધરપકડ કરી લીધી છે.
મુખ્ય આરોપીઓ ફરાર, શોધખોળ તેજ
આ હથિયાર કાંડના મુખ્ય આરોપીઓ ગણાતા પાપાઈ ઘોષ અને તેનો સાથી આસીમ સરકાર પોલીસને ચકમો આપીને ફરાર થઈ ગયા છે. બહેરામપુર પોલીસ આ બંને આરોપીઓને ઝડપી પાડવા માટે વિવિધ સ્થળોએ દરોડા પાડી રહી છે. આ હથિયારો કયા હેતુ માટે અને કોના ઈશારે એકઠા કરવામાં આવ્યા હતા, તે દિશામાં ઉંડી તપાસ શરૂ કરવામાં આવી છે.
રાજકીય ગરમાવો અને સુરક્ષામાં વધારો
બંગાળમાં હાલમાં જ સુવેન્દુ અધિકારીએ મુખ્યમંત્રી તરીકે શપથ લીધા છે અને રાજ્યમાં સત્તા પરિવર્તન બાદ તણાવપૂર્ણ સ્થિતિ જોવા મળી રહી છે. આવી ગંભીર પરિસ્થિતિમાં હથિયારોનો આટલો મોટો જથ્થો પકડાતા પોલીસ તંત્ર પણ એલર્ટ મોડ પર આવી ગયું છે. મુર્શિદાબાદ અને આસપાસના વિસ્તારોમાં સુરક્ષા વધારી દેવામાં આવી છે જેથી કોઈ અનિચ્છનીય બનાવ ન બને.