વોશિંગ્ટન, તા. ૧૩: અમેરિકાના ઇલિનોઇસ રાજ્યના ઓરોરા વિસ્તારમાં આવેલા એક પ્રખ્યાત હિન્દુ મંદિર પર સામૂહિક ગોળીબાર (માસ શૂટિંગ) કરીને મોટો નર સંહાર કરવાનું ભયાનક કાવતરું અમેરિકી કાયદા અમલીકરણ એજન્સીઓએ નિષ્ફળ બનાવ્યું છે. આ ઘટનાને પગલે ભારતના વિદેશ મંત્રાલયે (MEA) અત્યંત ગંભીર ચિંતા વ્યક્ત કરતાં ઘટનાની આકરા શબ્દોમાં નિંદા કરી છે. ભારતીય વિદેશ મંત્રાલયના પ્રવક્તા રણધીર જયસ્વાલે એક નિવેદન જારી કરીને જણાવ્યું છે કે અમેરિકામાં ભારતીય મૂળના લોકો અને હિન્દુ સમુદાય સામે વધી રહેલી નફરત અને જાતિવાદી દુશ્મનાવટ અત્યંત ચિંતાજનક છે.

આ સનસનાટીભર્યા કેસમાં અમેરિકી પોલીસે પેલેટાઇન વિસ્તારના રહેવાસી ૧૯ વર્ષીય એલેક્ઝાન્ડ્રોસ પાપોરાકિસ નામના યુવકની ધરપકડ કરી લીધી છે. પોલીસ તપાસ દરમિયાન શંકાસ્પદ યુવક પાસેથી એક વિવાદિત મેનિફેસ્ટો (જાહેરનામું) મળી આવ્યો છે, જેમાં શ્વેત સર્વોપરીતાવાદી (વ્હાઇટ સુપ્રિમેસિસ્ટ) વિચારો અને ભારતીય મૂળના લોકો સામે ભયાનક હિંસા આચરવાના ઉલ્લેખો મળી આવ્યા છે. જો સમયસર પોલીસ કાર્યવાહી ન થઈ હોત તો એક મોટો રક્તપાત સર્જાયો હોત.

આ ભયાનક કાવતરાનો પર્દાફાશ પાપોરાકિસના સાથે કામ કરતા સહકર્મચારીઓની સતર્કતાને કારણે શક્ય બન્યો હતો. ૧૯ વર્ષીય શંકાસ્પદે તેના સહકર્મચારીઓને કેટલાક વિવાદિત અને ડિજિટલ મેસેજ મોકલ્યા હતા, જેમાં સામૂહિક ગોળીબારની યોજનાનો નકશો અને વ્યૂહાત્મક હથિયારોના ફોટોગ્રાફ્સ સામેલ હતા. તેણે તેની ઓફિસમાં પણ ખુલ્લેઆમ કહ્યું હતું કે તે શ્વેત સર્વોપરીતામાં માને છે અને ભારતીય લોકોને મારવા માટે રાહ જોઈ શકતો નથી. આ મેસેજ મળતાં જ સહકર્મચારીઓએ તાત્કાલિક સ્થાનિક પોલીસને જાણ કરી હતી.

ભારતના વિદેશ મંત્રાલયે યુએસ સરકાર દ્વારા લેવાયેલા ઝડપી પગલાં અને શંકાસ્પદની ધરપકડની નોંધ લીધી છે, પરંતુ સાથે જ ભારતીય સમુદાયની સુરક્ષા સુનિશ્ચિત કરવા આકરાં પગલાંની માંગ કરી છે. પ્રવક્તા રણધીર જયસ્વાલે જણાવ્યું કે અમેરિકામાં વધતી ભારત વિરોધી નફરત સામે શૂન્ય સહિષ્ણુતા (Zero Tolerance) અપનાવવાની જરૂર છે. ભારત સરકાર અપેક્ષા રાખે છે કે યુએસ અધિકારીઓ આ બાબતની ઊંડાણપૂર્વક તપાસ કરીને જવાબદારોને કડકમાં કડક સજા અપાવશે.

અમેરિકામાં છેલ્લા કેટલાક સમયથી ધાર્મિક પૂજા સ્થળો અને ખાસ કરીને ભારતીય સમુદાયને નિશાન બનાવવાની ઘટનાઓમાં સતત વધારો નોંધાઈ રહ્યો છે, જેને લઈને ત્યાં રહેતા એશિયન અને ભારતીય મૂળના લોકોમાં ભારે અસુરક્ષા અને ગભરાટનો માહોલ જોવા મળી રહ્યો છે. આ અગાઉ પણ કેટલાક મંદિરોમાં તોડફોડ અને ભારત વિરોધી સૂત્રોચ્ચારની ઘટનાઓ સામે આવી ચૂકી છે.

ઘટના બાદ અમેરિકી કાયદા અમલીકરણ એજન્સીઓએ ઓરોરા વિસ્તારના હિન્દુ મંદિર અને આસપાસના વિસ્તારોમાં સુરક્ષા વ્યવસ્થા સઘન બનાવી દીધી છે. પોલીસ હવે આરોપીના ઓનલાઇન સંપર્કો, રાઇફલ ખરીદવાના પ્રયાસો અને તેની સાથે અન્ય કોઈ વ્યક્તિઓ જોડાયેલી હતી કે કેમ તે દિશામાં ફોરેન્સિક તપાસ ચલાવી રહી છે. સ્થાનિક ભારતીય સમુદાયે પણ પ્રશાસન પાસે પૂજા સ્થળોની કાયમી સુરક્ષા વધારવાની માંગ કરી છે.