રાંચી, તા. 18 જૂન 2026: ઝારખંડની રાજધાની રાંચીમાં રાષ્ટ્રીય સ્વયંસેવક સંઘ (RSS) ની ઓફિસ પર થયેલા પેટ્રોલ બોમ્બ હુમલાના કેસમાં એક અત્યંત ચોંકાવનારો અને ખળભળાટ મચાવતો ખુલાસો થયો છે. પોલીસ તપાસમાં સામે આવ્યું છે કે આ હુમલો કોઈ સામાન્ય ગુનાહિત પ્રવૃત્તિ નહોતી, પરંતુ તેની પાછળ પાકિસ્તાનની જાસૂસી સંસ્થા ISI દ્વારા ફંડેડ આતંકવાદી સંગઠન 'તહરીક-એ-તાલિબાન હિન્દુસ્તાન' (TTH) નો મોટો હાથ હતો. આ કેસમાં પકડાયેલા ત્રણ આરોપીઓની આકરી પૂછપરછ બાદ આ આંતરરાષ્ટ્રીય આતંકી નેટવર્કનો પર્દાફાશ થયો છે.
દુબઈ કનેક્શન અને એન્ક્રિપ્ટેડ એપ્સ દ્વારા હેન્ડલિંગ
સૂત્રોના જણાવ્યા અનુસાર, ધરપકડ કરાયેલા આરોપીઓ પૈકી સૈફ અંસારી અને અમન અંસારી અગાઉ દુબઈ ગયા હતા. ત્યાં તેઓ પાકિસ્તાની નાગરિક શાહબાઝ રાણા ઉર્ફે ભટ્ટીના સંપર્કમાં આવ્યા હતા. શાહબાઝે જ આ યુવાનોનું બ્રેઈનવોશ કરીને તેમને કટ્ટરપંથી બનાવ્યા હતા અને ભારતમાં વિધ્વંસક પ્રવૃત્તિઓ કરવા માટે TTH ના એજન્ડામાં સામેલ કર્યા હતા. ભારત આવ્યા બાદ પણ તેઓ 'બોટીમ' (Botim) અને 'વોટ્સએપ' જેવી હાઈલી એન્ક્રિપ્ટેડ મેસેજિંગ એપ્સ દ્વારા દુબઈ અને પાકિસ્તાનમાં બેઠેલા પોતાના આકાઓ સાથે સતત સંપર્કમાં હતા.
લાઈવ વીડિયો રેકોર્ડિંગ કરીને પાકિસ્તાન મોકલ્યું!
તપાસકર્તાઓએ ખુલાસો કર્યો છે કે આ આતંકીઓએ રાંચી સ્થિત RSS ઓફિસ પર પેટ્રોલ બોમ્બ ફેંકવાની કાયરતાપૂર્ણ ઘટનાને અંજામ આપતી વખતે પોતાના મોબાઈલ ફોનમાં તેનું લાઈવ વીડિયો રેકોર્ડિંગ પણ કર્યું હતું. હુમલો સફળ રહ્યો છે તે સાબિત કરવા માટે આ ફૂટેજ તાત્કાલિક તેમના પાકિસ્તાની હેન્ડલર સાથે શેર કરવામાં આવ્યા હતા.
અધિકારીઓના જણાવ્યા અનુસાર, આ કેસમાં કાયદાકીય સકંજો વધુ મજબૂત કરવા માટે ડિજિટલ પુરાવાઓ એકત્રિત કરવામાં આવી રહ્યા છે. આ નેટવર્ક ભારતના અન્ય કયા કયા શહેરોમાં ફેલાયેલું છે અને તેમના આગામી ટાર્ગેટ કોણ હતા, તે દિશામાં ગુપ્તચર એજન્સીઓ અને સ્થાનિક પોલીસ અત્યારે ઊંડાણપૂર્વક તપાસ ચલાવી રહી છે. આ ઘટના બાદ રાંચી સહિતના સંવેદનશીલ વિસ્તારોમાં સુરક્ષા વ્યવસ્થા ચુસ્ત કરી દેવામાં આવી છે.