ટોરોન્ટો, તા.02: કેનેડા જવા ઇચ્છતા હજારો ભારતીય વિદ્યાર્થીઓ અને પ્રોફેશનલ્સ માટે એક મહત્વપૂર્ણ અને ચોંકાવનારા સમાચાર સામે આવ્યા છે. ઑન્ટારિયો પ્રાંતે તેની આર્થિક ઈમિગ્રેશન સિસ્ટમમાં ધરખમ ફેરફારો કરીને 'ઑન્ટારિયો ઈમિગ્રન્ટ નોમિની પ્રોગ્રામ' (OINP) હેઠળના ઘણા મુખ્ય ઈમિગ્રેશન માર્ગોને તાત્કાલિક અસરથી બંધ કરી દીધા છે. આ નિર્ણય 30 મે, 2026 થી અમલમાં આવ્યો છે, જેણે ઘણા ઉમેદવારોની આશાઓ પર પાણી ફેરવી દીધું છે.
કયા સ્ટ્રીમ્સ પર લાગી રોક?
ઑન્ટારિયો સરકારે જે સ્ટ્રીમ્સ બંધ કર્યા છે તેમાં વિદેશી કામદારો (Foreign Worker), આંતરરાષ્ટ્રીય વિદ્યાર્થીઓ (International Student), ઇન-ડિમાન્ડ સ્કીલ્સ, માસ્ટર્સ અને પીએચડી ગ્રેજ્યુએટ સ્ટ્રીમ્સ, હ્યુમન કેપિટલ પ્રાયોરિટીઝ, ફ્રેન્ચ-બોલતા કુશળ કામદારો અને ઉદ્યોગસાહસિક (Entrepreneur) કેટેગરીનો સમાવેશ થાય છે. આ પ્રોગ્રામ દ્વારા જ અગાઉ હજારો લોકો કેનેડામાં કાયમી નિવાસ (PR) મેળવતા હતા.
અનિશ્ચિતતાનો માહોલ
હાલમાં ઑન્ટારિયો સરકાર પ્રોગ્રામના રિડિઝાઇન પર કામ કરી રહી છે, પરંતુ નવા નિયમો કે માર્ગો વિશે હજુ સુધી કોઈ સ્પષ્ટ વિગતો જાહેર કરવામાં આવી નથી. સરકાર હવે કયા નવા માપદંડો લાવશે કે ક્યારે નવા સ્ટ્રીમ્સ શરૂ થશે, તે અંગે કોઈ સ્પષ્ટતા ન હોવાથી સંભવિત અરજદારો ભારે મૂંઝવણમાં છે. નિષ્ણાતોના મતે, આ ફેરફારોથી કેનેડાના શ્રમ બજારમાં આવનારા સમયમાં મોટી અસર પડી શકે છે.
હાલની અરજીઓનું શું થશે?
જે ઉમેદવારોએ 30 મે, 2026 પહેલા પોતાની અરજી સબમિટ કરી દીધી હતી, તેમના માટે રાહતના સમાચાર છે. તેમની અરજીઓ જૂના નિયમો મુજબ જ પ્રોસેસ કરવામાં આવશે. આ ઉપરાંત, જોબ ઓફર-આધારિત 'એક્સપ્રેશન્સ ઓફ ઇન્ટરેસ્ટ' (EOI) ની જૂની નોંધણીઓ પણ અત્યારે સક્રિય રહેશે, પરંતુ હવે નવા અરજદારો માટે શું પ્રક્રિયા હશે તે જોવું રહ્યું.
ભવિષ્યની નવી રણનીતિ
ઑન્ટારિયો સરકાર હવે વધુ કુશળ અને શ્રમની અછતવાળા વ્યવસાયો ધરાવતા ઉમેદવારોને પ્રાધાન્ય આપવા માટે પ્રોગ્રામને એકીકૃત કરવા માંગે છે. ભવિષ્યમાં જે નવી જોબ ઓફર-આધારિત સ્ટ્રીમ્સ આવશે, તેમાં ઉમેદવારોએ એવા નોકરીદાતા (Employer) પાસે કામ કરવું પડશે જે OINP ડિરેક્ટર સાથે નોંધાયેલ હોય. આ પગલાનો ઉદ્દેશ્ય પ્રોગ્રામની ગુણવત્તામાં સુધારો કરવાનો હોવાનું પ્રાંતનું કહેવું છે.
જો તમે કેનેડા જવા માટે ઑન્ટારિયોના આ માર્ગો પર આધાર રાખી રહ્યા હતા, તો હવે તમારે સરકાર તરફથી નવી માર્ગદર્શિકા આવે ત્યાં સુધી રાહ જોવી પડશે અને વૈકલ્પિક માર્ગોનું મૂલ્યાંકન કરવું પડશે.