મુંબઈ : શેરબજારમાં આજે ટ્રેડિંગ સત્રની શરૂઆતમાં જ ફાર્મા ક્ષેત્રમાં એક મોટો ધમાકો જોવા મળ્યો હતો. ગ્લેન્ડ ફાર્મા (Gland Pharma) માં ₹૨,૮૦૦ કરોડની મંગી બ્લોક ડીલ પૂર્ણ થઈ છે. બજાર ખુલતાની સાથે જ કંપનીના ૯૮.૯૭ લાખ શેરની ખરીદ-વેચાણ થઈ હતી, જેમાં વિદેશી પ્રમોટર એજન્સીએ પોતાનો મોટો હિસ્સો વેચી દીધો છે, જ્યારે દેશના અગ્રણી મ્યુચ્યુઅલ ફંડ હાઉસોએ આ તક ઝડપીને કરોડો રૂપિયાનું રોકાણ કર્યું છે.

ફોસુન ફાર્માએ ૬% ઇક્વિટી હિસ્સો વેચ્યો:

આ બ્લોક ડીલ હેઠળ ચીનની અગ્રણી ફાર્માસ્યુટિકલ કંપની ફોસુન ફાર્મા (Fosun Pharma) એ ગ્લેન્ડ ફાર્મામાં પોતાનો ૯૮.૯૭ લાખ શેર અથવા ૬% ઇક્વિટી હિસ્સો લગભગ ₹૨,૮૦૦ કરોડમાં વેચીને મોટો નફો બુક કર્યો છે. સવારના સત્રમાં જ આટલા મોટા પાયે શેરનું વેચાણ થતાં બજારનું ધ્યાન આ સ્ટોક પર કેન્દ્રિત થયું હતું.

દેશના મ્યુચ્યુઅલ ફંડ્સે કરોડો રૂપિયા ઠાલવ્યા:

બીજી તરફ, ભારતની અગ્રણી મ્યુચ્યુઅલ ફંડ કંપનીઓએ ગ્લેન્ડ ફાર્માના શેરોમાં ભારે રસ દાખવ્યો હતો અને સરેરાશ ₹૨,૮૨૬.૬ પ્રતિ શેરના ભાવે ખરીદી કરી હતી:

•    કોટક મહિન્દ્રા મ્યુચ્યુઅલ ફંડ: ₹૭૮૯ કરોડમાં ૨૭.૯૩ લાખ શેર (૧.૬૯% હિસ્સો) ખરીદ્યા.

•    એક્સિસ મ્યુચ્યુઅલ ફંડ: ₹૩૮૪ કરોડમાં ૧૩.૫૭ લાખ શેર (૦.૮૨% હિસ્સો) મેળવ્યા.

•    ICICI પ્રુડેન્શિયલ મ્યુચ્યુઅલ ફંડ: ₹૨૯૪ કરોડના ખર્ચે ૧૦.૩૯ લાખ શેર (૦.૬૩% હિસ્સો) પોતાના પોર્ટફોલિયોમાં ઉમેર્યા.

ત્રણેય મ્યુચ્યુઅલ ફંડ્સે મળીને કુલ ૫૧.૮૯ લાખ શેર ખરીદ્યા છે. પ્રમોટર્સ દ્વારા હિસ્સો વેચાયા બાદ પણ ઘરેલુ ફંડ્સ તરફથી મળેલા આ મજબૂત પ્રતિસાદને કારણે રોકાણકારોનો ભરોસો જળવાઈ રહ્યો છે.