પટના : બિહારના રાજકારણમાં એક નવો અને આશ્ચર્યજનક ઘટનાક્રમ સામે આવ્યો છે. બિહાર વિધાન પરિષદના અધ્યક્ષ અને ભારતીય જનતા પાર્ટીના વરિષ્ઠ નેતા અવધેશ નારાયણ સિંહે પોતાના હોદ્દા પરથી રાજીનામું આપી દીધું છે. સત્તાધારી નેશનલ ડેમોક્રેટિક એલાયન્સ (NDA) માં મુખ્ય બંધારણીય પદોની વહેંચણીને લઈને ચાલી રહેલી ગતિવિધિઓ વચ્ચે આવેલા આ અચાનક રાજીનામાથી રાજ્યના રાજકીય વર્તુળોમાં મોટો ખળભળાટ મચી ગયો છે. સૂત્રોના જણાવ્યા અનુસાર, ભાજપ હાઇકમાન્ડની સૂચના મળ્યા બાદ જ અવધેશ નારાયણ સિંહે પોતાનું રાજીનામું સુપરત કર્યું છે.

આ અચાનક ફેરફાર પાછળ ભાજપ અને જનતા દળ યુનાઇટેડ (JDU) વચ્ચેનું રાજકીય સંતુલન મુખ્ય કારણ માનવામાં આવી રહ્યું છે. હાલમાં બિહારમાં સમ્રાટ ચૌધરી મુખ્યમંત્રી તરીકે કાર્યરત છે અને વિધાનસભાના અધ્યક્ષનું પદ પણ ભાજપ પાસે જ હતું. તેવામાં વિધાન પરિષદના અધ્યક્ષનું પદ પણ ભાજપ પાસે હોવાથી મિત્ર પક્ષ JDU તરફથી આ મહત્વપૂર્ણ હોદ્દા માટે સતત દાવો કરવામાં આવી રહ્યો હતો. બંને પક્ષોના ટોચના નેતૃત્વ વચ્ચે થયેલી સમજૂતી અને દબાણ બાદ ભાજપે વિધાન પરિષદનું અધ્યક્ષપદ JDU ને સોંપવાનો નિર્ણય લીધો હોવાનું સામે આવ્યું છે.

JDU ના વરિષ્ઠ નેતા રામવચન રાય બની શકે છે નવા અધ્યક્ષ

અવધેશ નારાયણ સિંહના રાજીનામા બાદ હવે JDU ના વરિષ્ઠ નેતા અને વિધાન પરિષદના વર્તમાન ઉપાધ્યક્ષ પ્રો. ડૉ. રામવચન રાયનું નામ નવા અધ્યક્ષ તરીકે સૌથી આગળ ચાલી રહ્યું છે. લાંબા સમયથી વિધાન પરિષદ સાથે જોડાયેલા રામવચન રાય જુલાઈ ૨૦૨૪ માં બિનહરીફ ઉપાધ્યક્ષ ચૂંટાયા હતા. ઔપચારિક પ્રક્રિયા પૂર્ણ થાય ત્યાં સુધી તેમને કાર્યકારી અધ્યક્ષની જવાબદારી સોંપાય તેવી પણ સંભાવના છે. આ ફેરફારથી બિહારમાં ભાજપ અને JDU વચ્ચે પદોની વહેંચણીનું એક નવું અને મજબૂત રાજકીય સમીકરણ આકાર લઈ રહ્યું છે.