નવી દિલ્હી :ભારત જેવા વિશાળ લોકશાહી દેશમાં ચૂંટણી પ્રક્રિયાને પારદર્શક અને સચોટ રાખવી એ એક મોટું પડકાર છે. આ દિશામાં એક મોટું કદમ ઉઠાવતા, ભારતના ચૂંટણી પંચે મતદાર યાદીના વિશેષ ગહન પુનરીક્ષણના ત્રીજા તબક્કાની જાહેરાત કરી છે. આ અભિયાનનો મુખ્ય ઉદ્દેશ્ય મતદાર યાદીમાં રહેલી ક્ષતિઓ દૂર કરવાનો અને તેને સંપૂર્ણપણે ક્ષતિરહિત બનાવવાનો છે.

આ ત્રીજા તબક્કા હેઠળ દેશના 16 રાજ્યો અને ત્રણ કેન્દ્રશાસિત પ્રદેશોને આવરી લેવામાં આવ્યા છે. ચૂંટણી પંચના જણાવ્યા અનુસાર, આ પ્રક્રિયા વસ્તી ગણતરીની ગૃહ-સૂચિકરણ પ્રક્રિયા સાથે તાલમેલ મિલાવીને તૈયાર કરવામાં આવી છે, જેથી ગ્રાઉન્ડ લેવલ પર કામગીરી વધુ સચોટ બની શકે. આ અભિયાન એટલું વિશાળ છે કે તેમાં અંદાજે 36.73 કરોડ મતદારોની વિગતોની ચકાસણી કરવામાં આવશે. આ તબક્કો પૂર્ણ થયા બાદ, માત્ર હિમાચલ પ્રદેશ, જમ્મુ-કાશ્મીર અને લદ્દાખને બાદ કરતાં સમગ્ર દેશ આ પુનરીક્ષણ પ્રક્રિયા હેઠળ કવર થઈ જશે.

આ કામગીરીને સફળ બનાવવા માટે ચૂંટણી પંચે ફિલ્ડ ફોર્સ તૈયાર કરી છે. અંદાજે 3.94 લાખ બૂથ લેવલ ઓફિસર્સ (BLO)) ડોર-ટુ-ડોર સર્વે હાથ ધરશે. આ અધિકારીઓ દરેક મતદારના ઘરે જઈને તેમની વિગતો જેવી કે નામ, ઉંમર, સરનામું અને ફોટોગ્રાફની ચકાસણી કરશે. આ પ્રક્રિયા દરમિયાન નવા પાત્ર મતદારોના નામ ઉમેરવામાં આવશે, જ્યારે મૃત્યુ પામેલા કે સ્થળાંતર કરી ગયેલા મતદારોના નામ યાદીમાંથી દૂર કરવામાં આવશે.

ચૂંટણી પંચ આ વખતે ટેકનોલોજીનો પણ વ્યાપક ઉપયોગ કરી રહ્યું છે. BLO દ્વારા એકત્રિત કરવામાં આવેલો ડેટા સીધો ડિજિટલ પોર્ટલ પર અપડેટ કરવામાં આવશે, જેથી ડુપ્લિકેટ એન્ટ્રીની શક્યતા નહિવત રહે. મતદાર યાદી પુનરીક્ષણ ની આ પ્રક્રિયાથી માત્ર ચૂંટણીમાં જ નહીં, પરંતુ સરકારી યોજનાઓના અમલીકરણમાં પણ સચોટ ડેટા ઉપલબ્ધ થશે. નાગરિકોને પણ વિનંતી કરવામાં આવી છે કે જ્યારે અધિકારીઓ તેમના ઘરે આવે ત્યારે સાચી માહિતી આપીને આ રાષ્ટ્રવ્યાપી અભિયાનમાં સહયોગ આપે.