ભાયંદર : મીરા-ભાયંદર વિસ્તારમાં કરોડો રૂપિયાની કિંમતી જમીન પચાવી પાડવાના એક અત્યંત ચર્ચાસ્પદ અને ગંભીર કેસમાં વડાપ્રધાન નરેન્દ્ર મોદીના શાળાના સમયના ૮૧ વર્ષીય સહપાઠી અસગરઅલી વોહરાએ સીધો વડાપ્રધાન કાર્યાલય (PMO) સુધી પહોંચીને ન્યાયની ગુહાર લગાવી છે. ભાયંદરમાં પોતાની જમીન પર કથિત રીતે ભૂમાફિયાઓ અને સ્થાનિક રાજકારણીઓની મિલીભગતથી થયેલા બનાવટી દસ્તાવેજોના કૌભાંડ મામલે તેમણે વડાપ્રધાન મોદી સાથે મુલાકાત કરી સમગ્ર વિવાદમાં સીધા હસ્તક્ષેપ અને સેન્ટ્રલ બ્યુરો ઓફ ઇન્વેસ્ટિગેશન (CBI) દ્વારા નિષ્પક્ષ તપાસની જોરદાર માંગ કરી છે.

અસગરઅલી વોહરાના જણાવ્યા અનુસાર, તેમણે ૧૯૮૯માં ભાયંદર (પૂર્વ)માં નવઘર રોડ પર આવેલી આશરે ૨,૮૧૦ ચોરસ મીટરની પ્રાઇમ લેન્ડ એક કાયદેસરના રજિસ્ટર્ડ કરાર દ્વારા ખરીદી હતી. આ મિલકત તેમણે ક્યારેય કોઈને વેચી કે હસ્તાંતરિત કરી ન હોવા છતાં, વર્ષ ૨૦૧૧માં 'સ્વયં બિલ્ડર્સ' (Swayam Builders) સાથેની મિલીભગતથી તેમની અજાણતાં જ બનાવટી કાગળો ઊભા કરીને જમીનના બે ટુકડા કરી દેવાયા હતા. આ જમીનનો એક ભાગ 'સ્વયં બિલ્ડર્સ' અને બીજો ભાગ સ્થાનિક ભાજપના પૂર્વ ધારાસભ્ય નરેન્દ્ર મહેતા સાથે સંકળાયેલી 'સેવન ઈલેવન કન્સ્ટ્રક્શન્સ' (Seven Eleven Constructions)ના ગેરકાયદેસર કબજા હેઠળ દર્શાવી દેવામાં આવ્યો હતો.

વોહરાએ મીરા-ભાયંદર મ્યુનિસિપલ કોર્પોરેશન (MBMC)ના ટાઉન પ્લાનિંગ વિભાગ, મહેસૂલ અધિકારીઓ અને પોલીસ તંત્ર પર ગંભીર આક્ષેપો મૂકતા જણાવ્યું હતું કે આ તમામ વિભાગોની છત્રછાયા હેઠળ ગેરકાયદેસર બાંધકામની મંજૂરીઓ આપવામાં આવી હતી. તેમણે ૨૦૧૫માં આ છેતરપિંડી અંગે સત્તાવાર FIR પણ નોંધાવી હતી, પરંતુ રાજકીય દબાણના કારણે આ કેસમાં CIDનો તપાસ અહેવાલ ૨૦૨૬માં – એટલે કે આશરે ૧૧ વર્ષના અસહ્ય વિલંબ બાદ રજૂ કરવામાં આવ્યો હતો. એટલું જ નહીં, ૨૦૨૫માં વૃદ્ધ અરજદારને ડરાવવા માટે તેમની સામે જ વિરોધાભાસી વળતા કેસો દાખલ કરી દેવાયા હતા.

જોકે, ૮૧ વર્ષીય વૃદ્ધ દ્વારા વડાપ્રધાન નરેન્દ્ર મોદી સમક્ષ આ સમગ્ર કૌભાંડ રજૂ કરાતાં જ સ્થાનિક નાગરિક વહીવટીતંત્રમાં ભારે હડકંપ મચી ગયો છે. PMO અને વડાપ્રધાનની દખલ બાદ જાગેલા મીરા-ભાયંદર મ્યુનિસિપલ કોર્પોરેશને તાકીદે આ બાબતની નોંધ લીધી છે. મહાનગરપાલિકા દ્વારા આગામી ૧૬ સપ્ટેમ્બરના રોજ એક ખાસ ઔપચારિક સુનાવણી નિર્ધારિત કરવામાં આવી છે અને વિવાદિત બાંધકામ કંપનીઓના પ્રતિનિધિઓ તથા અધિકારીઓને તમામ કાગળો સાથે હાજર રહેવા કડક સૂચના આપવામાં આવી છે.