કોલકાતા:  પશ્ચિમ બંગાળ સરકારે વિશ્વભરના પ્રવાસીઓને આકર્ષવા અને રાજ્યના પ્રવાસનને વૈશ્વિક સ્તરે નવી ઓળખ આપવા માટે એક ભવ્ય પ્રોમો વિડિયો જાહેર કર્યો. રાજ્યમાં ₹500 કરોડના નવા ઇન્ફ્રાસ્ટ્રક્ચર રોકાણ અને "પશ્ચિમ બંગાળ: જ્યાં ભારત અલગ અનુભવે છે" જેવી નવી ટેગલાઇન સાથે લોન્ચ કરાયેલી આ ઝુંબેશની શરૂઆત ધમાકેદાર રહી, પરંતુ વિડિયો સોશિયલ મીડિયા પર વાયરલ થતાં જ તે એક મોટો વિવાદ બની ગયો. વિડિયોની શરૂઆતમાં હાવડા બ્રિજની એક ઝલક દેખાય છે અને તે પછી બંગાળ સંપૂર્ણપણે ગાયબ થઈ જાય છે.

બંગાળની સંસ્કૃતિ અને સુંદરતા દર્શાવવાને બદલે આ જાહેરાતમાં ફ્રાન્સનો એફિલ ટાવર, રશિયાનું સેન્ટ બેસિલ કેથેડ્રલ, ઇજિપ્તના પિરામિડ અને રિયો ડી જાનેરોનું ક્રાઇસ્ટ ધ રિડીમર સ્ટેચ્યુ ધડાધડ બતાવવામાં આવ્યા. નેટીઝન્સ અને નેતાઓ આશ્ચર્યમાં પડી ગયા કે બંગાળના પ્રમોશન માટે વિશ્વના અન્ય દેશોના સ્મારકોનો મફત પ્રચાર કેમ થઈ રહ્યો છે? દાર્જિલિંગની પ્રખ્યાત ટોય ટ્રેન, વિક્ટોરિયા મેમોરિયલ, વિષ્ણુપુરના ટેરાકોટા મંદિરો અને સુંદરવનના જંગલો જેવા વાસ્તવિક પર્યટન સ્થળોને સંપૂર્ણપણે બાજુ પર રાખી દેવાતા સોશિયલ મીડિયા પર "આમાં બંગાળ ક્યાં છે?" નો પ્રશ્ન ટ્રેન્ડ થવા લાગ્યો છે.

આ વિડિયો સામે આવતા જ રાજકીય ગરમાવો પણ વધી ગયો છે. ટીએમસી સાંસદ ડેરેક ઓ'બ્રાયને આ જાહેરાતને "કચરો" ગણાવી ટીકા કરી હતી. ભૂતપૂર્વ રાજ્યપાલ તથાગત રોયે આને અત્યંત "મૂર્ખામીભર્યો અને કલાપ્રેમી પ્રયાસ" ગણાવી જાહેરાતને તરત જ પાછી ખેંચવાની માંગ કરી છે. રાજકીય વિશ્લેષકો પણ કટાક્ષ કરી રહ્યા છે કે જો બંગાળ પાસે પહાડોથી લઈને દરિયાકિનારા સુધી બધું જ છે, તો આંતરરાષ્ટ્રીય સ્મારકો દેખાડવાની શી જરૂર હતી? હાલમાં, આ અનોખી પ્રોમો જાહેરાત સોશિયલ મીડિયા પર ભારે ટ્રોલિંગ અને ચર્ચાનો વિષય બની ગઈ છે.