પશ્ચિમ બંગાળ વિધાનસભા ચૂંટણીના પરિણામો બાદ રાજ્યમાં સત્તા પરિવર્તન થયું છે, પરંતુ તેની સાથે જ હિંસાનો ભયાનક દોર શરૂ થયો છે. ભાજપની જીત બાદ રાજ્યના અનેક વિસ્તારોમાં તૃણમૂલ કોંગ્રેસ અને ભાજપના કાર્યકર્તાઓ સામસામે આવી ગયા છે. હાવડાના શિવપુર વિસ્તારમાં થયેલા બોમ્બમારા અને કાંથીમાં થયેલા હુમલાઓએ કાયદો અને વ્યવસ્થાની સ્થિતિ પર ગંભીર સવાલો ઉભા કર્યા છે.

ગુરુવારે બપોરે હાવડાના શિવપુર પોલીસ સ્ટેશન હેઠળના ચૌડાબસ્તી વિસ્તારમાં અચાનક બોમ્બમારો શરૂ થયો હતો. ભાજપનો આરોપ છે કે તૃણમૂલ નેતા શમીમ અહેમદના નેતૃત્વમાં તેમના કાર્યકર્તાઓ પર પથ્થરમારો અને બોમ્બ ફેંકવામાં આવ્યા હતા. આ હિંસામાં ભાજપના બે કાર્યકર્તાઓ ગંભીર રીતે ઘાયલ થયા છે. પરિસ્થિતિ એટલી તણાવપૂર્ણ બની હતી કે સુરક્ષા માટે રેપિડ એક્શન ફોર્સ (RAF) અને કેન્દ્રીય દળોની તૈનાતી કરવી પડી હતી. પોલીસ કમિશનર અખિલેશ ચતુર્વેદીએ જણાવ્યું કે આ  રાજકીય અથડામણ  છે અને દોષિતોની ધરપકડ માટે ચક્રો ગતિમાન કર્યા છે.

બીજી તરફ, કાંથીમાં યુથ તૃણમૂલ પ્રમુખ ઉસ્માન ગનીના ઘરને નિશાન બનાવીને બોમ્બ ફેંકવામાં આવ્યા હતા. સૌથી ચોંકાવનારી ઘટનામાં ભાજપના દિગ્ગજ નેતા સુવેન્દુ અધિકારીના પીએ ચંદ્રનાથ રથની ગોળી મારીને હત્યા કરવામાં આવી છે. રાજ્યમાં ચૂંટણી પછીની હિંસામાં અત્યાર સુધીમાં કુલ 5 લોકોના મોત થયા છે. આ ઘટનાઓને પગલે ભાજપના કાર્યકર્તાઓએ પોલીસ સ્ટેશનોનો ઘેરાવ કર્યો છે. બંગાળમાં સત્તા બદલાઈ રહી છે પણ હિંસાની પરંપરા હજુ અટકવાનું નામ નથી લઈ રહી, જેના કારણે સમગ્ર દેશમાં બંગાળના રાજકારણની ચર્ચા તેજ બની છે.