રાજકોટ: આજના આધુનિક સમયમાં LPG સિલિન્ડર આપણા રસોડાનું અભિન્ન અંગ બની ગયું છે, પરંતુ તેની સુરક્ષા બાબતે મોટાભાગના લોકો અજાણ હોય છે અથવા તો ગંભીર બેદરકારી દાખવે છે. ઘણીવાર આપણને ગેસ લીકેજ કે સિલિન્ડર બ્લાસ્ટના ડરામણા સમાચાર સાંભળવા મળે છે. શું તમે જાણો છો કે તમારી થોડીક જાગૃતિ તમને અને તમારા પરિવારને મોટી દુર્ઘટનાથી બચાવી શકે છે? ગેસ સિલિન્ડર તમારા ઘરે પહોંચે તે ક્ષણથી જ તેની સુરક્ષાની જવાબદારી તમારી શરૂ થાય છે.

સિલિન્ડર પર લખેલા કોડનો શું છે અર્થ?

મોટાભાગના ગ્રાહકોને એ ખબર જ નથી હોતી કે સિલિન્ડર પર એક ખાસ 'એક્સપાયરી ડેટ' લખેલી હોય છે. સિલિન્ડરના ઉપરના ભાગે પટ્ટી પર એક કોડ હોય છે, જેમાં A, B, C કે D જેવા અંગ્રેજી મૂળાક્ષરો અને સાથે આંકડા લખેલા હોય છે. અહીં A એટલે જાન્યુઆરી-માર્ચ, B એટલે એપ્રિલ-જૂન, C એટલે જુલાઈ-સપ્ટેમ્બર અને D એટલે ઓક્ટોબર-ડિસેમ્બર. તેની સાથે લખેલો નંબર વર્ષ દર્શાવે છે. જો સિલિન્ડરની એક્સપાયરી ડેટ નીકળી ગઈ હોય, તો તેને ક્યારેય સ્વીકારશો નહીં.

ડિલિવરી લેતી વખતે ખાસ રાખો આ બાબતોનું ધ્યાન

જ્યારે ગેસ એજન્સીનો માણસ સિલિન્ડર ઘરે લઈને આવે, ત્યારે ઉતાવળમાં સીધા પૈસા આપીને સિલિન્ડર ન લેવું. સૌ પ્રથમ આ બાબતો તપાસવી:

·         સીલ અને સેફ્ટી કેપ: ડિલિવરી લેતી વખતે હંમેશા તપાસો કે સિલિન્ડરની સીલ તૂટેલી તો નથી ને? જો સીલ સાથે છેડછાડ થઈ હોય તો તે સિલિન્ડર લેવાનો ઈનકાર કરો.

·         કાટ કે નુકસાન: સિલિન્ડરને ધ્યાનથી જુઓ, જો તેમાં ક્યાંય કાટ (Rust) કે ખાડા કે ઊંડા નુકસાનના નિશાન હોય, તો તે લેવાને બદલે તેને પાછું મોકલી દો.

·         વજન ચેક કરો: શક્ય હોય તો વજન કાંટા પર સિલિન્ડરનું વજન તપાસો, જેથી ખાતરી થાય કે સિલિન્ડર સંપૂર્ણ ગેસથી ભરેલું છે.

જો ખામી દેખાય તો શું કરવું?

જો તમને સિલિન્ડરમાં કોઈપણ પ્રકારની શંકાસ્પદ બાબત લાગે, તો તે સ્વીકારશો નહીં. તમારી ગેસ એજન્સીને તરત જ જાણ કરો. આ સ્થિતિમાં પુરાવા તરીકે સિલિન્ડરના ફોટા અથવા વીડિયો અવશ્ય લો. તમારી એક નાની અમથી તપાસ તમારા રસોડાને સુરક્ષિત રાખી શકે છે. સુરક્ષા એ માત્ર સરકાર કે એજન્સીની નહીં, પણ તમારી અંગત જવાબદારી પણ છે. તેથી, હવે જ્યારે પણ ગેસ સિલિન્ડર ઘરે આવે ત્યારે 'જાગૃત ગ્રાહક' બનીને જ તેને સ્વીકારવાનો આગ્રહ રાખો.