મુંબઈ: આગામી એશિયન ગેમ્સ ૨૦૨૬ માટે બીસીસીઆઈ દ્વારા ૩૦ ખેલાડીઓની યાદી તૈયાર કરવામાં આવી છે, જેમાં ૧૫ વર્ષીય યુવા બેટ્સમેન વૈભવ સૂર્યવંશીએ સ્થાન મેળવીને સૌને ચોંકાવી દીધા છે. બીજી તરફ, વર્તમાન ટી-૨૦ કેપ્ટન સૂર્યકુમાર યાદવ અને વન-ડેના કમાન સંભાળનાર શુભમન ગિલને આ યાદીમાંથી બાકાત રાખવામાં આવ્યા છે. કેપ્ટનશીપ માટે ત્રણ ખેલાડીઓ વચ્ચે જોરદાર સ્પર્ધા ચાલી રહી છે.

 

ભારતીય ક્રિકેટ કંટ્રોલ બોર્ડ (બીસીસીઆઈ) દ્વારા આગામી એશિયન ગેમ્સ ૨૦૨૬ માટેની કવાયત તેજ કરી દેવામાં આવી છે. જાપાનના આઈચી-નાગોયા ખાતે સપ્ટેમ્બર અને ઓક્ટોબર મહિનામાં યોજાનારા મેન્સ ક્રિકેટ ટુર્નામેન્ટ માટે ૩૦ સંભવિત ખેલાડીઓની યાદી ભારતીય ઓલિમ્પિક સંઘ (આઇઓએ) ને સુપરત કરવામાં આવી છે. આ યાદીમાં પસંદગીકારોએ કેટલાક કઠોર અને આશ્ચર્યજનક નિર્ણયો લીધા છે.

 

સૂર્યા-ગિલની બાદબાકી અને યુવા વૈભવનો ચમકારો:

આ લિસ્ટનો સૌથી મોટો અને ચર્ચાસ્પદ નિર્ણય ૧૫ વર્ષના ઉભરતા સ્ટાર વૈભવ સૂર્યવંશીની એન્ટ્રી છે. આઈપીએલ ૨૦૨૬ માં પોતાની વિસ્ફોટક બેટિંગથી સૌનું ધ્યાન ખેંચનાર વૈભવને સીધી એન્ટ્રી મળી ગઈ છે. આની સામે વર્તમાન ટી-૨૦ કેપ્ટન સૂર્યકુમાર યાદવ અને ટેસ્ટ-વનડેના સુકાની શુભમન ગિલને પડતા મુકાયા છે. પ્રાપ્ત અહેવાલો મુજબ, સૂર્યા હવે ૨૦૨૮ ના ઓલિમ્પિક કે આગામી ટી-૨૦ વર્લ્ડ કપના લાંબા ગાળાના આયોજનમાં ફિટ બેસતો નથી, જેથી તેને બાકાત રખાયો છે. બીજી તરફ, શુભમન ગિલને વન-ડે ટીમની કમાન સોંપવાની હોવાથી તેને આ ટુર્નામેન્ટમાંથી મુક્ત રખાયો છે.

 

એક સમયે બે સિરીઝ, બે અલગ ટીમની મજબૂરી:

ભારતીય ટીમનો વેસ્ટ ઈન્ડિઝ પ્રવાસ અને એશિયન ગેમ્સ એક જ સમયે આવી રહ્યા છે. ૨૪ સપ્ટેમ્બરથી ૩ ઓક્ટોબર વચ્ચે એશિયન ગેમ્સનો મેન્સ ક્રિકેટ ટુર્નામેન્ટ રમાશે, જ્યારે બરાબર એ જ અરસામાં એટલે કે ૨૭ સપ્ટેમ્બરથી ૧૭ ઓક્ટોબર દરમિયાન વેસ્ટ ઈન્ડિઝ સામે ૩ વન-ડે અને ૫ ટી-૨૦ મેચોની સિરીઝ રમાવાની છે. તારીખો ટકરાતી હોવાથી બીસીસીઆઈએ મજબૂરીમાં બે અલગ-અલગ ટી-૨૦ ટીમો તૈયાર કરવી પડી રહી છે.

 

કેપ્ટન કોણ બનશે? કોને મળી તક?

આ પ્રતિષ્ઠિત ટુર્નામેન્ટ માટે કેપ્ટન પદની રેસમાં શ્રેયસ ઐયર, સંજુ સેમસન અને તિલક વર્માના નામ સૌથી આગળ ચાલી રહ્યા છે. સ્ટાર ફાસ્ટ બોલર જસપ્રીત બુમરાહનું નામ ૩૦ ખેલાડીઓમાં છે, પરંતુ તેની પ્રાથમિકતા ૨૦૨૭ ના વન-ડે વર્લ્ડ કપની તૈયારીઓ રહેશે, એટલે કે તેનું ધ્યાન વન-ડે ક્રિકેટ પર જ રહેશે. સ્પિન આક્રમણમાં કુલદીપ યાદવ, અક્ષર પટેલ, વોશિંગ્ટન સુંદર અને હર્ષ દુબે છે, જેમાંથી માત્ર બે ખેલાડીઓ એશિયન ગેમ્સમાં જશે અને બાકીના વિન્ડીઝ સામે મેદાને ઉતરશે. ફિટનેસ પાછી મેળવવાની આશાએ હર્ષિત રાણાને પણ તક મળી છે. જ્યારે હોંગઝોઉ એશિયન ગેમ્સમાં ભારતને ગોલ્ડ મેડલ જીતાડનાર કેપ્ટન ઋતુરાજ ગાયકવાડને તાજેતરના નબળા ફોર્મ છતાં આ યાદીમાં જાળવી રાખવામાં આવ્યો છે.

 

બીસીસીઆઈના ૩૦ સંભવિત ખેલાડીઓની સંપૂર્ણ યાદી:

યશસ્વી જયસ્વાલ, અભિષેક શર્મા, વૈભવ સૂર્યવંશી, ઈશાન કિશન, સંજુ સેમસન, શ્રેયસ ઐયર, ઋષભ પંત, હાર્દિક પંડ્યા, રિંકુ સિંહ, તિલક વર્મા, જસપ્રીત બુમરાહ, અક્ષર પટેલ, અર્શદીપ સિંહ, કુલદીપ યાદવ, નીતિશ કુમાર રેડ્ડી, પ્રસિદ્ધ કૃષ્ણા, વરુણ ચક્રવર્તી, અનુકૂલ રોય, આયુષ બદોની, હર્ષ દુબે, ધ્રુવ જુરેલ, ખલીલ અહેમદ, ઋતુરાજ ગાયકવાડ, રવિ બિશ્નોઈ, શાહબાઝ અહેમદ, શિવમ દુબે, વિપરાજ નિગમ, હર્ષિત રાણા, યશ ઠાકુર અને વોશિંગ્ટન સુંદર. 

 

 એશિયન ગેમ્સની યાદીમાં સામેલ ગુજરાતના ખેલાડીઓ

બીસીસીઆઈ દ્વારા એશિયન ગેમ્સ માટે જાહેર કરાયેલી ૩૦ ખેલાડીઓની સંભવિત યાદીમાં ગુજરાતના નીચે મુજબના મુખ્ય ખેલાડીઓનો સમાવેશ થાય છે:

૧. હાર્દિક પંડ્યા (બરોડા/ગુજરાત)

૨. જસપ્રીત બુમરાહ (ગુજરાત)

૩. અક્ષર પટેલ (ગુજરાત)

 

(નોંધ: યુવા સ્પિનર રવિ બિશ્નોઈ પણ હાલમાં ડોમેસ્ટિક ક્રિકેટમાં ગુજરાત ક્રિકેટ એસોસિએશન તરફથી રમે છે, તેથી વર્તમાન સ્થિતિ મુજબ તેમનો પણ આ યાદીમાં ગુજરાતના ખેલાડી તરીકે ઉલ્લેખ કરી શકાય.)