ઢાકા : બાંગ્લાદેશના નવનિર્વાચિત પ્રધાનમંત્રી તારિક રહેમાને દેશના પદભ્રષ્ટ પૂર્વ પીએમ શેખ હસીના પર આકરા પ્રહારો કર્યા છે. પવિત્ર જન્માષ્ટમીના પર્વ નિમિત્તે રાજધાની ઢાકાના ઉસ્માનિયા મેમોરિયલ ઓડિટોરિયમ ખાતે આયોજિત એક વિશેષ કાર્યક્રમમાં બોલતા પીએમ તારિક રહેમાને શેખ હસીનાનું નામ લીધા વિના તેમની તુલના મથુરાના ક્રૂર રાજા 'કંસ' સાથે કરી હતી. તેમણે ઉમેર્યું હતું કે જેમ ભગવાન શ્રીકૃષ્ણે કંસના અત્યાચારોનો અંત આણીને ધર્મની સ્થાપના કરી હતી, તેમ બાંગ્લાદેશની જનતાએ પણ એક થઈને દોઢ દાયકા જૂના ફાશીવાદી શાસનનો ખાતમો બોલાવ્યો છે.

જન્માષ્ટમી પર્વે હિન્દુ સમુદાયને પાઠવી હૃદયપૂર્વકની શુભેચ્છાઓ

બાંગ્લાદેશ સરકારના ધાર્મિક બાબતોના મંત્રાલય અને હિન્દુ ધાર્મિક કલ્યાણ ટ્રસ્ટ દ્વારા આયોજિત આ કાર્યક્રમમાં પીએમ તારિક રહેમાન મુખ્ય અતિથિ તરીકે ઉપસ્થિત રહ્યા હતા. તેમણે હિન્દુ ધર્માચાર્યો અને પૂજારીઓ સાથે મુલાકાત કરી હતી તેમજ સમુદાયના અગ્રણીઓને સન્માનિત કર્યા હતા. આ પ્રસંગે તેમણે દેશ-વિદેશમાં વસતા તમામ સનાતનીઓને જન્માષ્ટમીની શુભકામનાઓ પાઠવતા જણાવ્યું હતું કે, બાંગ્લાદેશ દરેક નાગરિકનું છે અને તમામ ધર્મના લોકો માટે અહીં સમાન અધિકાર અને સુરક્ષા સુનિશ્ચિત કરવામાં આવશે.

પૌરાણિક કથાનો સંદર્ભ આપી શેખ હસીના પર નિશાન સાધ્યું

પોતાના સંબોધનમાં પૌરાણિક સંદર્ભ ટાંકતા તારિક રહેમાને કહ્યું કે, "આશરે ૫,૦૦૦ વર્ષ પહેલાં મથુરામાં જ્યારે જુલમી રાજા કંસનો અત્યાચાર વધી ગયો હતો, ત્યારે અસત્ય પર સત્યની વિજયપતાકા લહેરાવવા ભગવાન શ્રીકૃષ્ણનો જન્મ થયો હતો." આ કથાની તુલના બાંગ્લાદેશની રાજકીય સ્થિતિ સાથે કરતા તેમણે કહ્યું કે છેલ્લા દોઢ દાયકાથી દેશમાં પણ એક 'કંસ' જેવું જ શાસન હતું, જેણે સામાન્ય જનતાના તમામ લોકશાહી અધિકારો છીનવી લીધા હતા. પરંતુ તમામ વર્ગો અને રાજકીય પૃષ્ઠભૂમિના લોકોએ એકજૂથ થઈ બલિદાન આપ્યું અને તે સરમુખત્યાર શાસનનો અંત આણ્યો.

લોકશાહીના નવા યુગ તરફ આગળ વધતું બાંગ્લાદેશ

વડાપ્રધાન રહેમાને દેશના ઉજ્જવળ ભવિષ્યનો રોડમેપ રજૂ કરતા જણાવ્યું હતું કે, "લાંબા સંઘર્ષ બાદ હવે બાંગ્લાદેશ ફરી એકવાર લોકશાહીના સાચા માર્ગ પર પાછું ફર્યું છે. મજબૂત અર્થવ્યવસ્થા, ન્યાયી વહીવટીતંત્ર અને સુધારેલી કાયદો-વ્યવસ્થાના બળે આપણે દેશનું પુનર્નિર્માણ કરવા તરફ આગળ વધી રહ્યા છીએ."

ઉલ્લેખનીય છે કે ઓગસ્ટ ૨૦૨૪માં થયેલા જનઆંદોલન અને બળવા બાદ શેખ હસીનાએ ભારત જવું પડ્યું હતું. ત્યારબાદ દેશમાં યોજાયેલી સામાન્ય ચૂંટણીઓમાં તારિક રહેમાનની બાંગ્લાદેશ નેશનાલિસ્ટ પાર્ટી (BNP)એ ભવ્ય વિજય મેળવીને સત્તા સંભાળી છે. હાલ બાંગ્લાદેશ સરકાર દ્વારા ભારત પાસે શેખ હસીનાના પ્રત્યાર્પણની માંગણી પણ સતત કરવામાં આવી રહી છે.