ઢાકા  બાંગ્લાદેશના પદભ્રષ્ટ વડા પ્રધાન શેખ હસીનાના આગામી સમયમાં સ્વદેશ પરત ફરવાના નિવેદનો વચ્ચે બાંગ્લાદેશના આંતરરાષ્ટ્રીય ગુના ટ્રિબ્યુનલના મુખ્ય ફરિયાદી મોહમ્મદ અમીનુલ ઇસ્લામે સ્પષ્ટ કર્યું છે કે જો તેઓ વતન પરત ફરશે તો તેમને કાનૂની પ્રક્રિયા હેઠળ મૃત્યુદંડનો સામનો કરવો પડશે.

પ્રાપ્ત વિગતો અનુસાર, લંડન સ્થિત કાનૂની પ્રતિનિધિઓ મારફતે શેખ હસીનાએ નવી દિલ્હી સ્થિત બાંગ્લાદેશ હાઇ કમિશન સમક્ષ નવો પાસપોર્ટ અને રાષ્ટ્રીય ઓળખપત્ર જારી કરવા માટે વિનંતી કરી હતી, જેને ઢાકા પ્રશાસને સત્તાવાર રીતે ફગાવી દીધી છે.

બાંગ્લાદેશ સત્તાવાળાઓનું કહેવું છે કે મૃત્યુદંડની સજા પામેલા અથવા ગુનાહિત કેસોનો સામનો કરી રહેલા વ્યક્તિને મુસાફરી દસ્તાવેજો જારી કરવાની પ્રવર્તમાન કાનૂની જોગવાઈ નથી, જ્યારે હસીનાએ ડિસેમ્બરમાં કોઈપણ ડર વગર સ્વદેશ પરત ફરવાની યોજના બનાવી હોવાનું જણાવ્યું છે.

વર્ષ ૨૦૨૪ના ઓગસ્ટ મહિનામાં બાંગ્લાદેશમાં સર્જાયેલા વ્યાપક રાજકીય બળવા અને વિરોધ પ્રદર્શનો બાદ ભારત આશ્રય લેનાર શેખ હસીના સામે હાલ ૧૫૦થી વધુ ગંભીર ગુનાહિત કેસો નોંધાયેલા છે અને ટ્રિબ્યુનલ દ્વારા તેમને સજા પણ ફટકારવામાં આવી છે.

બાંગ્લાદેશી સરકારી પક્ષ અને ફરિયાદીઓનું માનવું છે કે જો હસીના ખરેખર કાનૂની લડાઈ લડવા માંગતા હતા, તો તેમણે ટ્રાયલ દરમિયાન હાજર રહીને નિર્ધારિત સમયમર્યાદામાં અપીલ દાખલ કરવી જોઈતી હતી, પરંતુ આમ ન કરવાથી તેમના હેતુઓ પર શંકા ઉપજે છે.

આગામી સમયમાં ભારત અને બાંગ્લાદેશ વચ્ચે રાજદ્વારી સ્તરે પ્રત્યાર્પણ અને મુસાફરી દસ્તાવેજોના મુદ્દે તણાવ વધુ વકરે તેવી પૂરી સંભાવના છે, કારણ કે ઢાકા દ્વારા સતત તેમના પ્રત્યાર્પણની માંગણી કરવામાં આવી રહી છે.