ક્વેટા (બલોચિસ્તાન) : પાકિસ્તાન શાસિત બલોચિસ્તાનમાં સેના અને ફ્રન્ટીયર કોર્પ્સ (FC) દ્વારા સ્થાનિક નાગરિકો પર થઈ રહેલા દમન અને માનવાધિકાર ઉલ્લંઘનનો વધુ એક અત્યંત શરમજનક કિસ્સો સામે આવ્યો છે. બલોચિસ્તાનના 'વધ' (Wadh) વિસ્તારમાં આવેલા 'કિલ્લી યાર મુહમ્મદ સોનારો' ખાતે ફ્રન્ટીયર કોર્પ્સના જવાનો દ્વારા કરવામાં આવેલા અંધાધૂંધ ગોળીબારમાં ૪ નિર્દોષ નાગરિકોના ઘટનાસ્થળે જ ભયાનક મોત નીપજ્યા છે. આ ગોળીબારમાં ૭ વર્ષના માસૂમ બાળક શાહઝૈબ સહિત અનેક નાગરિકો ગંભીર રીતે ઘાયલ થયા છે, જેના કારણે સમગ્ર ક્ષેત્રમાં ભારે તંગદિલી વ્યાપી ગઈ છે.

આ અમાનુષી ઘટના અંગે જાણીતા બલોચ માનવાધિકાર કાર્યકર સમ્મી દીન બલોચે સોશિયલ મીડિયા પ્લેટફોર્મ 'X' પર એક અત્યંત સંવેદનશીલ અને આકરો સંદેશ પોસ્ટ કરીને પોતાનો વિરોધ નોંધાવ્યો છે. તેમણે આ ઘટનાને બલોચ સમુદાયો વિરુદ્ધ પાકિસ્તાની સેના દ્વારા સુરક્ષાના નામે ચલાવવામાં આવતા કહેવાતા લશ્કરી અભિયાનોની અત્યંત દર્દનાક "માનવીય કિંમત" (Human Cost) તરીકે વર્ણવી છે. તેમણે આક્ષેપ કર્યો કે બલોચિસ્તાનમાં વર્ષોથી નાગરિકોની હત્યા કરવી, યુવાનોને બળજબરીથી ગાયબ કરી દેવા, ઘરો પર દરોડા પાડી પરિવારોને હેરાન કરવા અને સમગ્ર વસ્તી પર લશ્કરી બળનો પ્રયોગ કરવો એ એક સામાન્ય પદ્ધતિ બની ગઈ છે.

પાકિસ્તાની લશ્કરના આ અમાનવીય કૃત્ય સામે સવાલો ઉઠાવતા સમ્મી દીન બલોચે કહ્યું કે, "૭ વર્ષના નાના બાળક શાહઝૈબ પર ગોળી ચલાવવી અને નિર્દોષ નાગરિકોની હત્યા કરવી એ કઈ જાતનું સુરક્ષા અભિયાન છે? કેટલા માસૂમ બાળકોના બલિદાન લેવાયા પછી આ દમનને સુરક્ષા કાર્યવાહી કહેવાનું બંધ કરવામાં આવશે?" તેમણે સ્પષ્ટપણે જણાવ્યું હતું કે બલોચ બાળકોએ બંદૂકોના કાયમી ભય નીચે મોટા થવું ન જોઈએ અને આખા સમુદાયને ભયભીત રાખીને ક્યારેય સુરક્ષા સ્થાપિત થઈ શકે નહીં.

ઉલ્લેખનીય છે કે, પાકિસ્તાની સુરક્ષા દળો દ્વારા બલોચિસ્તાનમાં થઈ રહેલા અત્યાચારો સામે સ્થાનિક નાગરિકો અને માનવાધિકાર સંગઠનો આંતરરાષ્ટ્રીય સ્તરે સતત અવાજ ઉઠાવી રહ્યા છે, ત્યારે આ નવી ઘટનાએ પાકિસ્તાન સરકાર અને લશ્કરના ક્રૂર ચહેરાને ફરી એકવાર ખુલ્લો પાડી દીધો છે.