નવી દિલ્‍હી, તા.૧૯: સુપ્રીમ કોર્ટના તાજેતરના વલણથી એ સ્‍પષ્ટ થઈ ગયું છે કે હવે શેરીઓમાં રખડતા કૂતરાઓનો દબદબો લાંબો સમય નહીં ચાલે. ન્‍યાયાધીશ વિક્રમ નાથ અને તેમની બેન્‍ચે ૨૦૨૫ના કડક આદેશોમાં કોઈ પણ પ્રકારની છૂટછાટ આપવાનો ઇનકાર કરી દીધો છે. આ નિર્ણય માત્ર કાયદાકીય આદેશ નથી, પરંતુ દેશભરના એવા હજારો પરિવારો માટે આશાનું કિરણ છે જેમના માસૂમ બાળકો અવારનવાર રખડતા કૂતરાઓનો શિકાર બનતા હોય છે. કોર્ટે સ્‍પષ્ટ કર્યું છે કે પ્રાણીઓના અધિકારો મહત્‍વના છે, પરંતુ માનવીય જીવનની સુરક્ષા સાથે કોઈ સમજૂતી કરી શકાય નહીં.

આ કેસમાં સૌથી મહત્‍વનો વળાંક એ છે કે અગાઉ કૂતરાઓને પકડી, નસબંધી કરીને ફરી તે જ વિસ્‍તારમાં છોડી દેવાની જે પરંપરા હતી, તેને કોર્ટે અટકાવી દીધી છે. ઓગસ્‍ટ અને નવેમ્‍બર ૨૦૨૫માં અપાયેલા આદેશો મુજબ, પકડાયેલા કૂતરાઓને આશ્રયસ્‍થાનોમાં જ રાખવા પડશે. ખાસ કરીને શાળાઓ, રમતના મેદાનો અને રેલ્‍વે સ્‍ટેશનો જેવા ભીડભાડવાળા વિસ્‍તારોને ડોગ-ફ્રી ઝોન બનાવવા માટે સીમા દિવાલો બનાવવાનો નિર્દેશ આપવામાં આવ્‍યો છે. આ પગલું મ્‍યુનિસિપલ કોર્પોરેશનોની જવાબદારીમાં મોટો વધારો કરશે અને શહેરી આયોજનને નવી દિશા આપશે.

કોર્ટના આ ચુકાદાએ દેશમાં એક નવી ચર્ચા છેડી દીધી છે. એક તરફ પ્રાણી અધિકાર કાર્યકરો નસબંધીની પ્રક્રિયાને પૂરતી ગણાવતા હતા, ત્‍યારે બીજી તરફ સામાન્‍ય જનતા રસ્‍તા પર ચાલતા ડરનો અનુભવ કરતી હતી. સુપ્રીમ કોર્ટે રસીકરણ અને નસબંધીને પ્રોત્‍સાહન તો આપ્‍યું જ છે, પણ સાથે એમ પણ ટાંકયું છે કે નિર્દોષ બાળકો હડકવા જેવી જીવલેણ બીમારીનો ભોગ બને તે તંત્રની નિષ્‍ફળતા છે. હવે જો કોઈ વહીવટી તંત્ર આ આદેશના પાલનમાં નિષ્‍ફળ જશે અથવા કોઈ વ્‍યક્‍તિ આ પ્રક્રિયામાં અવરોધ ઉભો કરશે, તો તેમની સામે કડક કાનૂની કાર્યવાહી કરવામાં આવશે