કેનબરા, તા.08: ઓસ્ટ્રેલિયામાં અભ્યાસ અને નોકરી કરવાનું સ્વપ્ન સેવતા લાખો આંતરરાષ્ટ્રીય વિદ્યાર્થીઓ, ખાસ કરીને ભારતીય સમુદાય માટે મોટા સમાચાર સામે આવ્યા છે. ઓસ્ટ્રેલિયાના મુખ્ય વિપક્ષી ગઠબંધને (લિબરલ્સ અને નેશનલ્સ) આગામી ચાર વર્ષમાં દેશમાં કામચલાઉ સ્થળાંતર કરનારાઓની વસ્તીમાં આશરે ૬,૫૦,૦૦૦ સુધીનો ધરખમ ઘટાડો કરવાની એક વ્યાપક યોજના જાહેર કરી છે. વસ્તી નિયંત્રણ અને સ્થાનિક સંસાધનો પરનું ભારણ ઘટાડવાના હેતુથી લાવવામાં આવેલા આ પ્રસ્તાવમાં આંતરરાષ્ટ્રીય વિદ્યાર્થીઓ માટેના વિઝા નિયમો અત્યંત સખત બનાવવાની ભલામણ કરવામાં આવી છે.

નવી પ્રસ્તાવિત નીતિ હેઠળ મોટાભાગના આંતરરાષ્ટ્રીય વિદ્યાર્થીઓ પર પોતાના પરિવારના સભ્યો કે આશ્રિતો (ડિપેન્ડન્ટ્સ) ને સાથે લાવવા પર સંપૂર્ણ પ્રતિબંધ મૂકવાની યોજના છે. આ ઉપરાંત, વિઝા સિસ્ટમનો દુરુપયોગ રોકવા માટે વિદ્યાર્થી વિઝાને ચોક્કસ શૈક્ષણિક સંસ્થાઓ સાથે સીધા લિંક કરવામાં આવશે અને નક્કી કરાયેલા પાર્ટ-ટાઇમ કામના કલાકોના નિયમોનું ઉલ્લંઘન કરનારાઓ સામે કડક કાનૂની કાર્યવાહી કરવામાં આવશે. ગઠબંધનના મતે આ પગલાંથી ઉચ્ચ શિક્ષણ ક્ષેત્રે વિદેશી વિદ્યાર્થીઓનો હિસ્સો ૨૫ ટકાથી નીચે લાવવામાં મદદ મળશે.

જોકે, આ સખત નિયમો વચ્ચે અમુક ચોક્કસ ક્ષેત્રના વિદ્યાર્થીઓને રાહત આપવામાં આવી છે. પીએચડી (PhD) પૂર્ણ કરી રહેલા, આરોગ્ય (Health) તથા શિક્ષણ (Education) ક્ષેત્રે અભ્યાસ કરતા અથવા તો પ્રાદેશિક (Regional) યુનિવર્સિટીઓમાં ભણતા વિદ્યાર્થીઓ માટે અભ્યાસ પૂરો કર્યા પછીના ટ્રાન્ઝિશનલ વર્ક વિઝાના વિકલ્પો યથાવત રાખવામાં આવશે. આ પગલાં દ્વારા ઓસ્ટ્રેલિયન સિસ્ટમને સસ્તા શ્રમ બળને બદલે ઉચ્ચ કૌશલ્ય ધરાવતા સ્થળાંતર (Skilled Migration) તરફ વાળવાનો મુખ્ય દ્રષ્ટિકોણ રજૂ કરવામાં આવ્યો છે.

વિપક્ષી ગઠબંધનની આ જાહેરાત સામે ઓસ્ટ્રેલિયાના શિક્ષણ ક્ષેત્રમાંથી મિશ્ર પ્રતિક્રિયાઓ જોવા મળી રહી છે. ઓસ્ટ્રેલિયાની અગ્રણી સંશોધન યુનિવર્સિટીઓના સમૂહ 'ગ્રુપ ઓફ એઇટ' (Go8) અને 'યુનિવર્સિટીઝ ઓસ્ટ્રેલિયા' દ્વારા આ પ્રસ્તાવ અંગે ગંભીર ચિંતા વ્યક્ત કરવામાં આવી છે. શિક્ષણ સંસ્થાઓનું માનવું છે કે આવા વ્યાપક પ્રતિબંધોથી ઓસ્ટ્રેલિયાના આંતરરાષ્ટ્રીય શિક્ષણ ક્ષેત્ર, સ્થાનિક નોકરીઓ અને ભવિષ્યના કુશળ કાર્યબળને મોટો ફટકો પડી શકે છે.

અત્રે નોંધનીય છે કે, હાલની સત્તાધારી લેબર સરકારે પણ તાજેતરમાં જ નવા વિદ્યાર્થી વિઝા નિયમો અમલી બનાવ્યા હતા, જેના હેઠળ મોટાભાગના વિદ્યાર્થીઓને પરિવાર લાવવા પર પ્રતિબંધિત કરાયા હતા. સરકારી આંકડા મુજબ હાલની નીતિઓના કારણે ઉચ્ચ શિક્ષણ માટેની વિઝા અરજીઓમાં અગાઉના વર્ષ કરતાં ૯ ટકા અને વિઝા મંજૂરીઓમાં ૧૭ ટકાનો ઘટાડો નોંધાઈ ચૂક્યો છે.

વિપક્ષી શેડો ઇમિગ્રેશન મંત્રી જોનો ડુનિયમે સ્પષ્ટ કર્યું છે કે કામચલાઉ વિઝા ધારકો દ્વારા કરવામાં આવતા વિઝા સ્વિચિંગ પર કડક નજર રાખવામાં આવશે. ગઠબંધને પ્રથમ બે વર્ષ માટે ચોખ્ખી વિદેશી હિજરત (Net Overseas Migration) ઘટીને ૧,૦૦૦,૦૦ સુધી મર્યાદિત કરવાનો અને માનવતાવાદી વિઝા પ્રવેશને અડધો કરવાનો પ્રસ્તાવ આપ્યો છે. આગામી સમયમાં આ મુદ્દો ઓસ્ટ્રેલિયાના રાજકારણ અને વિદેશી વિદ્યાર્થીઓની નીતિઓ માટે ખૂબ જ નિર્ણાયક બની રહેશે.