રામપુર : સપાના વરિષ્ઠ નેતા આઝમ ખાનની મની લોન્ડરિંગના ગંભીર આક્ષેપો હેઠળ ED દ્વારા ધરપકડ કરવામાં આવ્યા બાદ હવે તેમના સમગ્ર પરિવાર પર ધરપકડની તલવાર લટકી રહી છે. જૌહર યુનિવર્સિટીના નિર્માણમાં ₹૪૦૦ કરોડથી વધુના કાળા નાણાં અને ₹૮૦ કરોડથી વધુના સરકારી ભંડોળના દુરુપયોગના આક્ષેપોમાં ઇડીની નજર હવે તેમની પત્ની (યુનિવર્સિટી સેક્રેટરી), બહેન (ખજાનચી) અને બે પુત્રો પર કેન્દ્રિત થઈ છે. જૌહર ટ્રસ્ટના કુલ નવમાંથી પાંચ ટ્રસ્ટીઓ આઝમ ખાનના પરિવારના જ હોવાથી સમગ્ર પરિવાર કાનૂની શિકંજામાં ફસાયો છે.

ED દ્વારા ૧૩ ઓક્ટોબરના રોજ અઝીમ નગર પોલીસ સ્ટેશનમાં નોંધાવાયેલી FIR અનુસાર, જૌહર ટ્રસ્ટ દ્વારા નિર્માણ પામેલી આ ખાનગી યુનિવર્સિટીમાં મોટા પાયે નાણાકીય અનિયમિતતાઓ આચરવામાં આવી છે. ખાનગી સંસ્થામાં ગેરકાયદેસર રીતે સરકારી ભંડોળ વાળવાનો અને શેલ (નકલી) કંપનીઓ મારફતે દાનના નામે કાળું નાણું સફેદ કરવાનો ખેલ ટ્રસ્ટ દ્વારા જ પાર પાડવામાં આવ્યો હતો. પરિણામે, ટ્રસ્ટના હોદ્દેદારો તરીકે જવાબદારી ધરાવતા ખાન પરિવારના સભ્યો સામે શિકંજો વધુ મજબૂત બન્યો છે.

આ કેસના ફિલો-અપ અને તપાસના ઘટનાક્રમ મુજબ, ED આ નાણાકીય લેવડ-દેવડમાં સામેલ શેલ કંપનીઓના નેટવર્ક અને બેંક ખાતાઓની ઊંડાણપૂર્વક છાનબીન કરી રહી છે. ટ્રસ્ટના મહત્વના હોદ્દાઓ પર પરિવારજનો જ બિરાજમાન હોવાથી કાગળો અને નાણાકીય નિર્ણયોમાં તેમની સીધી સંડોવણી હોવાનું પ્રાથમિક દ્રષ્ટિએ સામે આવ્યું છે. ટૂંક સમયમાં જ ED દ્વારા પરિવારના સભ્યોને પૂછપરછ માટે સમન્સ પાઠવીને આગળની ધરપકડ સહિતની કડક કાનૂની કાર્યવાહી કરવામાં આવે તેવી પૂરેપૂરી શક્યતા છે.