​અયોધ્યા: અયોધ્યાના ભવ્ય રામ મંદિરમાં પ્રસાદની ચોરીના મામલાએ સમગ્ર દેશમાં ભારે ચકચાર જગાવી છે. આ મામલાની તપાસ કરી રહેલી સ્પેશિયલ ઇન્વેસ્ટિગેશન ટીમ (SIT) ના હાથે હવે એક ખૂબ જ ચોંકાવનારી કડી હાથ લાગી છે. તપાસ એજન્સીએ મહેશ કુમાર નામના એક શંકાસ્પદ કર્મચારીને નજર હેઠળ લીધો છે, જેની સંપત્તિનો આંકડો તેની આવકના સ્ત્રોત કરતા અનેકગણો વધારે હોવાનું બહાર આવ્યું છે.

​૧૫ હજારનો પગાર અને ૨૦ કરોડની મિલકત

તપાસ દરમિયાન સામે આવેલી વિગતો અનુસાર, મહેશ કુમાર કે જે લાર્સન એન્ડ ટુબ્રો (L&T) ના કર્મચારી તરીકે ઓળખ આપતો હતો, તેનો માસિક પગાર માત્ર ૧૫,૦૦૦ થી ૧૮,૦૦૦ રૂપિયાની વચ્ચે છે. તેમ છતાં, માત્ર એક જ વર્ષમાં તેણે અયોધ્યા, બસ્તી, લખનૌ અને પ્રયાગરાજ જેવા વિવિધ શહેરોમાં અંદાજે ૨૦ જેટલી સ્થાવર મિલકતો વસાવી છે, જેની બજાર કિંમત ૨૦ કરોડ રૂપિયાથી વધુ હોવાનો અંદાજ છે. આ તમામ સંપત્તિ તેણે તેના ભાઈ, પત્ની, ભાભી, બહેન અને અન્ય સંબંધીઓના નામે ખરીદી હોવાનું દસ્તાવેજોમાં જણાયું છે.

​મુખ્ય આરોપી સાથે ગાઢ સંબંધો

મહેશ કુમાર આ પ્રસાદ ચોરીના મુખ્ય આરોપી રામશંકર યાદવ ઉર્ફે 'ટિનુ' નો અત્યંત નજીકનો સાથી હોવાનું SIT તપાસમાં સ્પષ્ટ થયું છે. તે અયોધ્યામાં ટિનુના ઘરે ભાડૂઆત તરીકે રહેતો હતો. મંદિરના ગણતરી ખંડમાં સીધી ફરજ ન હોવા છતાં, તે હિસાબ-કિતાબ અને ટેલી શીટ તૈયાર કરવાનું કામ કરતો હતો. આ હોદ્દાનો દુરુપયોગ કરીને તેણે આ આર્થિક ગોટાળા આચર્યા હોવાની પ્રબળ શંકા છે. આ અંગે SIT અને વરિષ્ઠ અધિકારીઓને લેખિત ફરિયાદ મળતા જ તપાસનો વ્યાપ વધારવામાં આવ્યો છે.

​તપાસનો વ્યાપ વધ્યો, ફાઇનલ રિપોર્ટમાં વિલંબ

SIT એ આ મામલે મહેશ કુમારને પૂછપરછ માટે લખનૌ તેડાવ્યો છે. પ્રોજેક્ટ ડિરેક્ટરના જણાવ્યા મુજબ, મુખ્ય કંપનીના ડેટામાં આ નામનો કોઈ કર્મચારી નોંધાયેલ નથી, જેથી તે પેટા-કંપનીનો હોવાની શક્યતા છે. SIT દ્વારા તૈયાર કરવામાં આવતા અંતિમ તપાસ અહેવાલની મુદત ૧૫ જુલાઈ હતી, પરંતુ તપાસના નવા વળાંકોને ધ્યાનમાં લેતા આ સમયમર્યાદામાં ૨ થી ૩ દિવસનો વધારો કરવામાં આવ્યો છે.

​હવે SIT ની ટીમ ટૂંક સમયમાં અયોધ્યા પહોંચીને પૂર્વ અને વર્તમાન ટ્રસ્ટના પદાધિકારીઓ સહિત બેંક, મંદિર પ્રશાસન અને અન્ય સંબંધિત વ્યક્તિઓની પૂછપરછ કરશે. સૂત્રોના જણાવ્યા અનુસાર, ફાઇનલ રિપોર્ટમાં અનેક મોટા માથાઓના નામ આરોપી તરીકે સામેલ થઈ શકે છે, જે આ કેસને વધુ ગંભીર વળાંક આપશે.