ઇસ્લામાબાદ, તા.૧૬: ભારત અને પાકિસ્તાન વચ્ચે ચાલી રહેલા રાજકીય અને તણાવપૂર્ણ સંબંધો વચ્ચે એક મોટા સમાચાર સામે આવ્યા છે. પાકિસ્તાન એરપોર્ટ્સ ઓથોરિટી (PAA) એ ભારતીય વિમાનો માટે પાકિસ્તાની એરસ્પેસ (હવાઈ ક્ષેત્ર) પર લાદવામાં આવેલો પ્રતિબંધ વધુ એક મહિના માટે લંબાવી દીધો છે. આ નવો આદેશ ૨૪ ઓક્ટોબર, ૨૦૨૬ સુધી અમલમાં રહેશે, જેના કારણે ભારતીય એરલાઈન્સ અને આંતરરાષ્ટ્રીય ફ્લાઈટ્સને લાંબા રૂટ પરથી ઉડાન ભરવાની ફરજ પડશે.

બુધવારથી જ અમલમાં આવ્યો નવો આદેશ

પાકિસ્તાન એરપોર્ટ્સ ઓથોરિટી દ્વારા જારી કરવામાં આવેલી તાજી 'નોટિસ ટુ એરમેન' (NOTAM) અનુસાર, આ મુદતવધારો બુધવારે સવારે ૧૦:૪૫ વાગ્યાથી સત્તાવાર રીતે અમલમાં આવી ગયો છે. હવે ભારતમાં નોંધાયેલા કોઈપણ વિમાન, ભારતીય એરલાઇન્સ કે ઓપરેટરો દ્વારા સંચાલિત, માલિકીના અથવા લીઝ પર લેવાયેલા વિમાનો (લશ્કરી ફ્લાઇટ્સ સહિત) માટે પાકિસ્તાનનું હવાઈ ક્ષેત્ર ૨૪ ઓક્ટોબર ૨૦૨૬ના રોજ સવારે ૦૪:૫૯ વાગ્યા સુધી ઉપલબ્ધ રહેશે નહીં.

પહેલગામ હુમલા બાદ સર્જાયો હતો એરસ્પેસ વિવાદ

ઉલ્લેખનીય છે કે, એપ્રિલ ૨૦૨૫ માં થયેલા ભયાનક પહેલગામ આતંકવાદી હુમલા બાદ ભારત અને પાકિસ્તાન બંને દેશે એકબીજાની એરલાઇન્સ માટે પોતપોતાના એરસ્પેસ બંધ કરી દીધા હતા. અગાઉ આ પ્રતિબંધની મુદત ૨૪ સપ્ટેમ્બરના રોજ પૂર્ણ થવાની હતી, પરંતુ પાકિસ્તાને આકરી નીતિ જાળવી રાખીને મુદત પૂરી થાય તે પહેલાં જ તેમાં વધુ એક મહિનાનો વધારો કરી દીધો છે.

કરાચી અને લાહોર બંને ઝોનમાં કડક પાબંદી

પાકિસ્તાન સિવિલ એવિએશન ઓથોરિટીના નિયમો મુજબ દેશના હવાઈ ક્ષેત્રને બે મુખ્ય ફ્લાઇટ ઇન્ફોર્મેશન રિજન (FIRs) - કરાચી અને લાહોરમાં વહેંચવામાં આવ્યું છે. નવીનતમ NOTAM નોટિસ કરાચી અને લાહોર બંને ક્ષેત્રોને સમાન રીતે લાગુ પડે છે. પાકિસ્તાનના આ નિર્ણયને કારણે પશ્ચિમ દેશો અને મધ્ય-પૂર્વ (Middle East) તરફ જતી ભારતીય ફ્લાઇટ્સનો પ્રવાસ સમય અને ઇંધણનો ખર્ચ વધી જશે.